«Нарт» стадион республикада эм уллу стадионду. Аллыбызда кёзюуде анга уллу реконструкция этилликди. Бусагъатда аны  ол реконструкциягъа хазырлауну ремонт ишлери бара  турадыла.
Бу спорт къуралыш 7,5 минг квадрат метр джерни алады. 40 джылны узагъына ол республиканы да, аны аралыгъыны да стадион борчун сый бла толтуруб келгенди. Ол заманны ичинде анга бир кере да ремонт этилмегенди. Аны себебли анга уллу реконструкция этерге белгиленнгенди.

Ол иш бла байламлы кёб болмай Къарачай-Черкес Республиканы Башчысы Темрезланы Рашид, стадионнга келиб,  анда бу спорт къуралышха реконструкция этиу ишле къалай баргъанларына тинтиб къарагъанды. Ол кёзюуде ачыкъланнганына кёре, бу спорт объектни «Россия Федерацияда физкультура бла спортну ёсдюрюу» деген федерал программагъа кийириб, аны тамамлы джоюмуна бериллик ачханы ёлчемин белгилер ючюн, уллу хазырлау иш бардырылгъанды.
Алай бла Къарачай-Черкесияны баш стадионунда 10 минг адамгъа орунлары болгъан джангы трибуналадан башлаб, спортсменлеге тренировкаларын бардырыргъа башлары джабылгъан юч джангы спорт залгъа эмда дженгил атлетика бла кюрешгенлеге деб манежге дери ишленникди. Футбол тюз да, ариу джарашдырылыб, джангы  дренаж система бла баджарыллыкъды. Стадионну ичинде баскетбол, болейбол площадкала да боллукъдула.
Объектге къараб бошагъандан сора, Темрезланы Рашид Правительствону членлеринден, стадионну реконструкциясы ючюн джууаблы адамладан спорт объектни норматив излемлерин  ажымсыз толтуруллукъларын, сакъат адамлагъа трибуналада, мекямлада керекли орунла  болурча этерге борч салгъанды.