Бу кюнледе Къарачай-Черкес Республиканы Башчысы Темрезланы Рашид Оператив штабны кенгешин бардыргъанды. Анда Зеленчук, Къарачай, Уруп чегетчиликлени джерлеринде от тюшгенни юсюнден сорууланы сюзгендиле.

Мындан алда кюнле бек исси болгъанлары амалтын республиканы тёрт джеринде, Зеленчук чегетчиликни Ермоловкадагъы джери да ары кириб, къауданнга от тюшгенди. Регионну Башчысы Темрезланы Рашидге Къарачай-Черкес Республиканы Чегетлерини управлениесини тамадасыны борчларын толтургъан Николай Кулаков хапар айтханнга кёре, болум бек аманнга кетмегенди. Кебген ханс къабыныб джаннганлыкъгъа табигъатха уллу заран тюшмегенди. Тереклени, кёкенлени тыш къабукълары кюймегендиле. Бусагъатда от джайылыб, адамла джашагъан джерлеге заран келтирирча тюлдю. От тюшген джер къаялада, уллу ташлы къыйын джерледеди.
Кенгешни кёзюуюнде чертилгенден, чегетчиле болумну контролда тутадыла. От джайыла башласа, аны джукълатырча мадарла, амалла эркиндиле.
Темрезланы Рашидни аманатын толтура, Оператив штаб къуралгъанды. Ары Правительствону членлери, МЧС-ни, районну администрацияларыны,  чегет управлениелени, закон-джорукъ сакълагъан органланы къуллукъчулары киредиле. От тюшген джерде 50 адам, 8 техника ишлейди.
Темрезланы Рашид от нек тюшгенини чурумун ачыкълар ючюн МЧС бла МВД-ны, Чегетлени управлениесини, джергили администрацияланы къуллукъчулары биригиб ишчи къауум къураргъа аманат этгенди. Бусагъатда да кюнле исси болгъанлары ючюн, республикада болум таб джарашыб къалмагъанды. Башчы аны бла байламлы республиканы бютеу джеринде да отдан къоркъуусузлукъну сакъларгъа кереклисин айтханды.
Башчы Оператив штабха Къарачай-Черкес Республиканы джеринде отха  къаршчы мизамны толусу бла сакъларгъа кереклисин, Правительствону бегимин толтура, кебген хансха от салыргъа эркинлик болмагъанын адамлагъа айтыб, ангылатыргъа тыйыншлы болгъанын да билдиргенди.
 
ЛЕПШОКЪЛАНЫ Хусеин.

 
{jcomments}