Аууз-герги (октябрь) айны 15-де Къарачай-Черкесияда «Молодой предприниматель России - 2019» деген Бютеуэресей конкурсну эсеблерин чыгъаргъандыла.

«Социал табышлылыкъ» деген номинацияда 25 джыл болгъан Ёзденланы Рамазан алчы болгъанды. Ол къарачай миллет бычакъланы чыгъарыуну джангыртыу проектни теджегенди конкурсха.

«Тиширыу табышлылыкъ» номинацияда 21 джыл болгъан Элкъанланы Салиманы консалтинг агентство къурауну юсюнден проекти биринчи орунну алгъанды.

«Франчайзинг» номинацияда 30 джыл болгъан Джуккаланы Руслан хорлагъанды.

«Джумуш теджеу» номинациягъа 26 джыл болгъан Текеланы Ахмат джашар юйлени къурулуш проекти бла биринчи оруннга тыйыншлы болгъанды.

«Билим бериу санагъатда табышлылыкъ» номинацияда 25 джыл болгъан Мурат Озовну сохтала бла студентлени финанс билимлерин ёсдюрюрлей эмда табышлылыкъны баш амалларына юретирлей къысха болджаллы курсланы къурау оюму игиге саналгъанды.

«Производство» номинацияда 29 джыл болгъан Джанкёзланы Эдуардны 188 миллион сомгъа джараусузгъа чыкъгъан агъачны ууакълаб гранулала этиу проекти хорлагъанды.

«Интернет табышлылыкъ» номинацияда 21 джыл болгъан Байрамукъланы Нюр-Ахмат «Маркетплейс туристических услуг КЧР» проекти бла биринчи оруннга чыкъгъанды.

«Инновация табышлылыкъ» деген номинацияда 26 джыл болгъан Къочхарланы Магометни «Арба» деген миллет энчилиги болгъан онлайн-такси эмда аны Интернет сайтын къурау проекти хорлагъанды.

«Сатыу-алыу» номинацияда 27 джыл болгъан Денис Бремни «AIS» деген халал косметиканы чыгъарыу эмда сатыу» деген проекти алгъанды алчылыкъны.

«Эл мюлк табышлылыкъ» деген номинацияда 24 джыл болгъан Лайпанланы Расул «Бассейнде чабакъ ёсдюрюу эмда аны сатаргъа хазырлау» деген проекти бла хорлагъанды.

Конкурсда алчы болгъан джашла бла къызла дипломла, статуэткала, телефонла бла саугъаланнгандыла. Саугъалау «Инвестируй в КЧР» деген табышлылыкъ форумну тамалында бардырылгъанды.

(Бизни корр.).