Къыркъар (август) айны 28-де Ючкекен элни 11-чи номерли орта школунда республиканы устазларыны кёзюулю конференциялары бардырылды.
Конференцияда КъЧР-ни Башчысы Темрезланы Рашид дагъыда башха джууаблы къуллукъчула болдула. Сёз КъЧР-ни Башчысына берилгенинде, ол устазланы джангы окъуу джыл бла алгъышлаб, ишлеринде джетишимле теджеди.
Бир къауум устазлагъа «Къарачай-Черкес Республиканы махтаулу устазы», «Къарачай-Черкес Республиканы халкъ окъуууну махтаулу къуллукъчусу» деген сыйлы атла аталгъанын билдириб, алагъа тыйыншлы къагъытларын берди.
Андан сора Башчы Уллу Ата джурт къазауатны джылларында Ючкекенден кетиб фашистле бла сермешгенлеге аталыб салыннган эсгертмеге барыб, гокка хансла салыб, ючкекенчиле аны ариу тутханларына къууаныб, разылыгъын билдирди. Аны ызындан районну джамагъаты бла тюбеширге кетди. Тюбешиу а, районну Маданият къаласында боллукъ эди. Темрез улу Маданият къаланы къатында ишленнген джангы паркга къараб чыкъды. Парк таб джарашдырылгъанды: бассейн, сабийле ойнай турурча площадка бардыла. Джолчукъланы эки джаны бла раузан гюлле ёседиле, солургъа келгенле олтурурча ариу шиндикле салыннгандыла. Кече сайын фонарла джанадыла, паркны ичи не заманда да джарыкъды. Къысхача айтсакъ, къуру ючкекенчиле тюл, Гитче Къарачай районну башха эллеринден келгенле да бош заманларында паркны ичинде солурча болумла къуралгъандыла.
Парк ишленди, иш аны бла бошалды дерча тюлдю болум. Паркга кирген тийрени мындан ары да айбат этиу, джарашдырыу барлыкъды. Парк Маданият къаланы къатында болурун ючкекенчиле кеслери излегендиле. Нек десегиз, районда джарыкълыкъ ишлени бары да Маданият къалада боладыла. Къууанч ишлеге кёб адам джыйылыучанды. Бир къауумла эртдерекъ келиб, паркда солуб, алай кириучендиле Маданиятны къаласына. Районну Джарыкълыкъ юйю  60-чы джылланы аллында ишленнген эди. Джылла оза,  тозураб, сахнасы тарлыкъ этиб башлагъан эди. Энди аны толусу бла джангыртырыкъдыла. Алай этилсе,  аны сахнасы эркин болгъаны бла къалмай, ичине да кёб адам сыйынныкъды.
Гитче Къарачай район уллу районланы бириди, - дейди ючкекенчи Борлакъланы Хасан. – Ючкекенни кесинде 15 мингден аслам адам джашайды. Элде кёб къатлы мийик юйле эркиндиле. Аланы хар бирини къатында сабий площадкала джокъдула. Ол болгъанла да тозурагъандыла. Бир къауумлары уа джараусуз болгъандыла.
Паркга къараб чыкъгъанындан сора, КъЧР-ни Башчысы районну джамагъаты бла тюбешди. Биринчи ол «Устойчивое развитие сельских территорий» деген программа бла байламлы бир къауум гитчекъарачайчылагъа юйле ишлерге неда сатыб алыргъа сертификатла берди.
Темрез улугъа адамла кёб соруула бердиле. Аланы ичинде джолланы джангыртыу, элчилени таза суу бла баджарыу дагъыда башха соруула бар эдиле. Сорууланы барына да КъЧР-ни Башчысы джууаб бериб мындан ары да элчилени джашау болумларын игилендириу, керекли затларын баджарыу дегенча, ишле барыб турлукъларын билдирди.
Районда этилиннген ишлени юсюнден Гитче Къарачай районну администрациясыны башчысы Байрамукъланы Рамазан хапар айтды. Ол айтханнга кёре, 2018-чи джыл Терезе элде 300 адамгъа орну болгъан Маданият къалагъа деменгили ремонт этилиб, ол хайырланыугъа берилгенди. Красный Восток элде да озгъан джыл энчи адамланы эмда къралны болушлугъу бла 1300 квадрат метр джерде маданиятны эмда спортну къаласы ишлениб, хайырланыугъа берилгенди. 650 квадрат метр джерде да кёб мадарлары  болгъан спорт площадка ишленнгенди.
Красный Курган элде да 350 адамгъа орну болгъан Джарыкълыкъ юйге деменгили ремонт этилгенди. Андан сора да Красный Курган элден башлаб «Медовые водопады» турист базагъа баргъан джол аман болумда эди. Алайды да, озгъан джыл узунлугъу 7500 метр болгъан джолну толусу бла джангыртыб, асфальт тёшеб, джолчула аны хайырланыугъа берген эдиле.
Тюбешиуню аягъында КъЧР-ни Башчысы тамамлау сёзюн айтды.
- Бюгюн сиз Гитче Къарачай районда тюбеген джарсыуланы юсюнден хапар айтдыгъыз. – Джарсыу ишле къоратыла, чыгъа барадыла. Джашау алайды. Учхара ишле бардыла деб, аланы къоратмай турсакъ, андан аман иш джокъду. Ючкекенде 7-чи номерли орта школну мекямы озгъан ёмюрде ишленнген эди. Ашыгъыш ишленнгени амалтын аны джетишмеген затлары кёб эди. Кёб болмай мекям тозурагъаны амалтын, аны джабаргъа керек болду. 2021-чи джыл 960 сабийге орну болгъан школну мекямыны къурулушу башланныкъды. Бюгюннгю заманны излемине келишген школ боллукъду ол.
Ючкекен элни кесини фельшер-акушер пункту болмагъаны да аманды. Джууукъ заманлада фельдшер-акушер пунктну ишлеуню юсюнден сёз кёлтюрюллюкдю. Андан сора да район больницаны мекямын джангыртыргъа керек болуб турады. Аны юсюнден да сёз барлыкъды, - деди Темрез улу.
Хар ким да тургъанлай, КъЧР-ни Башчысы КъЧР-ни къурулуш эмда фатар-коммунал мюлкюню министрине къыш сууукъла джетиб къалгъынчы районну саулукъ-багъыу учреждениесине джылыуну бериучю эски чоюнланы орнуна джангыланы салыргъа кереклисин билдирди.
Ючкекенде кёб этажлы юйле кёбдюле. Аланы бир къауумларыны арбазлары аман болумдадыла. Аланы джарашдырыу, джети этажлы общежитиени башын джангыдан джабыу да къолгъа алынныкъды быйыл. 2020-чы джыл Ючкекенде Лайпанланы Сеийтни атын джюрютген орамны 600 метрине деменгили ремонт этилинникди. Первомайский элде уа гитче стадионну къурулушу толусу бла битерикди. Келир джыл а бу элни айбат этиуге уллу эс бёлюннюкдю. Элкъуш элде да спорт плошадка ишлер мурат барды. Красный Восток элни джолларыны къоркъуулу джерлерине къаралыб, ала да ариу джарашдырыллыкъдыла.
Башчыны айтханына кёре, Гитче Къарачай районда алаша терек бачхаланы программасын джашауда толтурургъа мурат барды. Терек бачхаланы ёсдюрюуге районну джери таб келишеди. Айтылгъан затланы бары да джашауда толлукъларын чертди Башчы сёзюн тамамлай…
Къобанланы Махмут.
 
{jcomments}