Бу кюнледе Санкт-Петербургда «Saint Petersburg Travel Hub» деген аты бла халкъла арасы туризм форум бардырылгъанды. Форумгъа къошулгъанланы Къарачай-Черкес Республиканы туризм халы бла да танышдыргъандыла.

Регионал экспозициялагъа Эресей Федерацияны вице-премьери Ольга Голодец бла Санкт-Петербургну губернаторуну борчларын толтургъан Александр Беглов къарагъандыла. Республиканы туризмини, курортларыны эмда джаш тёлю политикасыны министрини биринчи орунбасары Павел Селипетов аланы Къарачай-Черкес Республиканы туризм халыны  хакъындан экспозициясы бла танышдыргъанды. Ол республикада турист-рекреацион санагъатха властла таймаздан эс бёлюб тургъанларыны эмда туризмни ёсюб баргъаныны юсюнден толу хапар айтханды. Республикагъа келген туристлени саны ёсгенден ёсюб баргъаны да анга толу шагъатлыкъ этеди.
Шимал Кавказны регионларыны бирикген экспозицияларыны стендине да къараб, санагъат устала бла да сёлешгенден сора, Ольга Голодец туризм санагъатны ёсюмюне уллу багъа бергенди, мындан ары да къралгъа уллу магъанасы болгъан бу санагъатха уллу джетишимле теджегенди.
Аны бла бирге «Экспофорумну» джеринде Бютеудуния Баш Турист Ассамблея бирлешликни (ЮНВТА) 23-чю сессиясы да ётгенди. 130 къралдан келген келечиле турист санагъатны ёсдюрюр ючюн этилирге керекли ишлени сюзгендиле.
Бу джыйылыуну Эресей Федерацияны Туризмни хакъындан федерал агентствосу бла Санкт-Петербургну Правительствосу къурагъандыла.