Бу кюнледе КъЧР-ни Правительствосуну Председателини орунбасары Чеккуланы Хызыр, Правительствону членлери, Черкесск шахарны мэри Руслан Тамбиев Черкесскеде 18-чи номерли орта школну тамалында физкультура-саулукъ сакълау аралыкъны ачхандыла. Ол «Демография» деген миллет проектни «Спорт – норма жизни» деген федерал программасыны тамалында ишленнгенди. Арт беш джылны ичинде Черкесскеде, бютеу республикада да спорт инфраструктураны ёсдюрюр джанындан кёб иш этилгенди. Ол зат республикада джашагъанлагъа, шахарчылагъа физкультура бла, спорт бла кюреширге себеб болгъанды.
Алайды да, Черкесскеде физкультура бла, спорт бла кюрешгенлени саны 45,6 минг адамгъа джетгенди. Ол сан бу шахарда джашагъанланы 37,2 процентиди.
«Сабийлеге, шахарда джашагъанланы барына да деб быллай аламат аралыкъла ишленнгенлери барыбызны къууандырады. Асыулу иш бардыргъанлары ючюн Черкесскени мэриясына уллу разылыгъымы билдиреме. Джаш адамлагъа да спорт джетишимле эмда рекордла теджейме», - дегенди Чеккуланы Хызыр.
Руслан Тамбиев кесини сёзюнде Къарачай-Черкесияны эмда Черкесск шахарны Кюнлерине джыл сайын быллай саугъала этиу ашхы адет болуб баргъанын чертгенди.
«Бу ачыкъ спорт аралыкъ шахарны бу микрорайонунда джашагъанлагъа бек уллу саугъады. Джай былайда футбол, къыш хоккей ойнаргъа боллукъду. Чабарча джолчукъла, эшикде орналгъан тренажёрла дагъыда башха затла бардыла. Къысхасыча айтыргъа, спорт бла кюреширге не таблыкъла да къуралгъандыла. Биз шахарыбызны сюебиз, аны бла ёхтемленебиз, аны ариу эмда кирсиз болурун излейбиз», - дегенди Руслан Тамбиев.
СЕМЕНланы Зарем
{jcomments}
