Кёб болмай Къарачай-Черкес Республиканы Башчысы Темрезланы Рашид ишни юсю бла Зеленчук районнга баргъан эди.

КъЧР-де адамланы саулукъларына къарагъан эмда бакъгъан эм уллу учреждениелени бири Зеленчук район больница болгъаны хакъды. 

Бу аралыкъ больницагъа Зеленчук, Уруп, Хабез районладан эмда «Архыз» курортда солугъан заманларында ауругъанла болсала, бери келиб, кеслерине къаратадыла.
Былтыр Эресейни Президентини резерв фондундан келген ачхагъа Зеленчук больницаны юч бёлюмюне (терапевт, стерилизацион аралыкъ, пищеблок) тамамлы ремонт этилген эди. Эски болгъан инженер коммуникацияланы, эшиклени, терезелени, полланы  къобарыб алыб, аланы орнуна джангыла салгъандыла.
Темрезланы Рашид больницаны къан тамырлагъа къарагъан, бакъгъан бёлюмюнде джатханлагъа  тюбеб, ушакъ этгенди. Ушакъны кёзюуюнде, адамны аурууун ачыкълагъан джангы медицина оборудованиеле керек болгъанлары ачыкъланнганды. Ауругъанлагъа тыйыншлысыча болушлукъ этер ючюн «Здравоохранение» деген миллет проектни хайырындан федерал бюджетден келген ачхагъа, бюгюнню излемине джууаб берген компьютер томографла, адамны аурууун ачыкълагъан джангы медицина оборудованиеле эмда башха затла алынныкъларын айтханды Темрез улу.
   Кёб болмай «Здравоохранение» деген миллет проектни хайырындан районну сабий поликлиникасына джаппа-джангы рентгенодиагностика аралыкъ алыб, джарашдыра турадыла. Бир айны ичинде ол аралыкъ ишлеб башларыкъды.
Къарачай-Черкес Республиканы Башчысы Темрезланы Рашид этилген ишлени ачыкълай, мындан ары да ауругъанлагъа тыйыншлы болушлукъ болурча къаллай ишле этилселе дурус боллугъун черте,  районну, больницаны башчыларына аманат этгенди.