Россияны къошакъ билим берген джети учреждениеси «Всероссийский открытый интернет выставки-смотра образовательных учреждений: от детского сада до университета» деген конкурсда алчы оруннга чыкъгъанды. Къарачай-Черкесияда къошакъ билим берген аралыкъ аланы бириди.

Конкурсха Россия Федерацияны джер-джеринден 500-ден аслам окъуу учреждение къошулгъанды.
«Сабийлеге къошакъ билим берген учреждение» деген номинацияда бизни республиканы келечилери Дондагъы Ростов, Братск, Вологда, Свердловск шахарланы, Краснодар эмда Ставрополь крайланы, Ханты-Мансийск автоном округну, Белгород, Воронеж областланы эмда башхаланы айтылыб тургъан организациялары бла эришгендиле.
- Бу уллу конкурсда хорлагъаныбыз онглу джетишимди, бизни аралыкъ баджаргъан ишге жюри тыйыншлы багъа бергенди, - дегенди КъЧР-де къошакъ билим берген аралыкъны директору Джанкёзланы Земфира.
Бу конкурс быйыл майны 10-дан июнну 2-не дери бардырылгъанды. Хорлагъанлагъа тыйыншлы саугъаларын Москвада 2017-чи джылны октябрь айында берликдиле.