Бу кюнледе Къарачай-Черкес Республиканы Правительствосуну Председателини биринчи орунбасары Байчораланы Эльдар «Россельхозбанк» АО-ну Ставрополда регионал бёлюмюню тамадасы Зоя Тихомирова бла тюбешгенди. 

Ол тюбешиуге «Россельхозбанк» АО-ну Къарачай-Черкес Республикада регионал директору Елена Шрам бла КъЧР-ни эл мюлк министрини орунбасары Юлия Самсонова да къошулгъандыла.

Белгилисича, Къарачай-Черкес Республикада, Шимал Кавказ федерал округну башха регионларындача, 2014-чю джылдан бери энчи фермер мюлклеге эмда энчи адамлагъа кредит бериуге мардала салыннгандыла.
Байчораланы Эльдар чертгенден, ол мардаланы бир бёлегин къоратыргъа керекди.
Биринчиси, бу банкны юсю бла пенсияларын алгъан пенсионерлеге ол мардала тийишмезге кереклисини юсюнден барды сёз. Бусагъатда кредит алыр ючюн пенсия юч айны Россельхозбанкны юсю бла келирге керекди. Байчора улу айтхандан, республикада пенсионерле эм джууаблы, борчларына уллу эс бёлген къауумдула. Аны тышында да, районлада Россельхозбанкны таймаздан клиентлери пенсионерледиле.
«Россельхозбанк» АО-ну КъЧР-де бёлюмюне башха банкла берген кредитлени джабарча эркинликле бериуню юсюнден да сёлешиннгенди тюбешиуде. Энчи фермер мюлкле кредит джарашдырыр ючюн дуния бла бир къагъыт джыйыб джарашдырыргъа керек боладыла. Ол къагъытланы тизимин азайтыуну да сюзгендиле джыйылгъанла.
Байчораланы Эльдар айтхандан, бёлек марда къоратылса, республиканы джамагъаты керекли джумушларын тыйыншлысыча тындырыр мадар табарыкъды.