Элия (июль) айны 26-да Къарачай-Черкес Республиканы Сайлау комиссиясыны председатели Абазалыланы Лариса РФ-ны бютеу субъектлери бла видеоконференция джорукъда бардырылгъан Эресейни Ара сайлау комиссиясыны кенгешинде 2019-чу джылны сайлау кампаниясына хазырланыу къалай баргъаныны юсюнден сёлешгенди. 

«Чёб атылгъан кюн, 2019-чу джыл къыркъаууз (сентябрь) айны 8-де, Къарачай-Черкесияда информацион технологияла кенг хайырландырыллыкъдыла. Сайлау участоклагъа, бюгюнню излемине кёре, компьютерле салынныкъдыла. Сайлаула онлайн режимде бардырыллыкъдыла. QR-код бла участок сайлау комиссияны протокол къагъытларын дженгил огъуна джиберир мадар къураллыкъды. «Мобильный избиратель» технология хайырландырыллыкъды. Сайлау участоклагъа видеокамерала, сайлау бюллетенлени атаргъа компьютерли ящикле салынныкъдыла», - дегенди Абазалыланы Лариса.
Сайлауланы кюнюнде, 2019-чу джыл къыркъаууз (сентябрь) айны 8-де, республиканы джеринде 22 сайлау кампания бардырыллыкъды. КъЧР-ни Халкъ Джыйылыууна (Парламентине) алтынчы кере депутатла сайлау да аланы ичиндеди.