Арт джыллада Къарачай-Черкес Республикада спорт инфраструктураны къурулушу тири бардырылады.  Районлада, шахарлада спорт аралыкъла, бассейнле, спорт площадкала, футбол тюзле ишленедиле. Саулай да аллай объектле 60-дан асламдыла.

Быйыл Джёгетей Аягъы шахарда физкультура эмда саулукъ сакълау аралыкъ ачыллыкъды. Аны къурулушу къалай бардырылгъанына бу кюнледе Къарачай-Черкес Республиканы Башчысы Темрезланы Рашид къарагъанды. Аралыкъны тамалы уллу спортзалды, анда волейбол, баскетбол, гандбол эмда мини-футбол ойнарча неси да джарашдырыллыкъды.

Мекямны экинчи къатында спортчула тутуш бла кюреширге эмда  билек кючлерин ёсдюрюрге мадар табарыкъдыла. Джангы спорт аралыкъда республикан джараджада эришиуле бардырырча этилликди хар неси.
Спорт аралыкъны тышында да Джёгетей Аягъы шахарда 3-чю номерли школну тёгеригин джарашдырыргъа буйрукъ бергенди Башчы. Джангы спорт аралыкъ ол школну къатында ишленнгенди. Алайда дагъыда адамла юйдегилери, сабийлери бла солурча джер да джарашдырыллыкъды.
Джангы спорт аралыкъ Уллу Хорламны 75-джыллыгъына аталыб, байрамны кюнюне джууукъ заманда ачыллыкъды. Аны себебли, Къарачай-Черкес Республиканы Башчысы Темрезланы Рашидни оноуу бла, анга «Хорлам» деб аталлыкъды.
Быйыл къачда Зеленчук стансе бла Учкулан элде да джангы спорт аралыкъланы къурулушлары башланныкъды.