Джыл сайын элия (июль) айны 14-де Къарачай-Черкес Республикада Эресейни Почтасыны кюнюн белгилейдиле.
Озгъан ыйыкъда республиканы почтасыны къуллукъчулары санагъат байрамларына республикан эмда джамагъат бирлешликледен къонакъла чакъырыб, къууанч халда джыйылыу бардырдыла.
«Эресейни Почтасы РФ-ны баш предприятиелерини тизимине киреди. Къралда болгъан предприятиеле бла тенглешдирсенг, Эресейни Почтасыны филиалларыны саны барындан да асламды. Аны 42 минг почта бёлюмюнде 300 минг ишчи къуллукъ этеди. Алай бла ол Эресейде эм кёб къуллукъчусу болгъан организациягъа саналады. УФПС-ни КъЧР-де «Почта России» филиалы да ол уллу предприятиени бир бёлегиди. Къарачай-Черкес Республиканы почтасы адамланы излемлерин толтургъан, кереклилерине къарагъан организацияланы арасында энчи орун алады», – дейди КъЧР-ни УФПС-ни тамадасы Лайпанланы Ахмат.
Ол билдиргеннге кёре, уллу джетишимлеге джетер ючюн, Эресейни Почтасы бусагъат заманны излемине кёре джангы технологияланы Къарачай-Черкесияны джеринде джашаугъа сингдириб, адамлагъа эмда почтаны къуллукъчуларына да таблыкъла къурагъанлай турады. Республиканы почталарында 1000 адам къуллукъ этеди. Ала бары да джамагъатыбызгъа джарар джанындан биригиб ишлейдиле.
Джыйылыуда КъЧР-ни Почта къуллугъуну алчыларын эмда бирси ишчилени Къарачай-Черкес Республиканы Халкъ Джыйылыууну (Парламентини), КъЧР-ни Миллет ишлерини, кёбчюлюк коммуникацияла бла басманы хакъындан министерствосу, КъЧР-ни Сатыу-алыу бла промышленностуну министерствосуну Хурмет грамоталары бла эмда башха саугъала бла сыйларын кёрдюле.
Эресейни Почтасыны Къарачай-Черкес Республикада филиалыны къурамында 3 почтамт, 147  почта бёлюм барды. Аладан 33-сю шахарда, 116-сы да элледе орналыбдыла.
(БИЗНИ КОРР.).
 
{jcomments}