Къарачай-Черкес Республиканы Башчысы Темрезланы Рашидни аманаты бла республиканы къурулуш эмда фатар-коммунал мюлкюню министри Евгений Гордиенко Джёгетей Аягъы районда кенгеш бардыргъанды.

Аны ишине Къарачай-Черкес Республиканы окъуу бла илму министри Инна Кравченко, Джёгетей Аягъы муниципал районну башчысы Лайпанланы Мурат, Гюрюлдеуюк элни башчысы Айбазланы Хыйса эмда «Карачаевочеркесавтодор» РГКУ-ну управлениесини келечилери да къошулгъан эдиле.

Кенгешде Гюрюлдеуюк элде джангы орта школ эмда суу алгъан кёпюрню ишлеуню юсюнден баргъанды сёз.
Джангы школ ишлерге деб берилген джерде эки къатлы мекям ишлерге деб оноулашдыла. Анда 165 сохта окъурча орун боллукъду. Белгиленнген бла, школну хар не кереги да джарашыб болургъа керекди. Сабийле кюнорта азыкъ ашарча энчи хант юйю да боллукъду. Элдеги эски школ 1925-чи джыл ишленнгенди. Джангы школ «Образование» деген миллет проектни тамалында ишленникди.
Мындан алда уллу джангурла джаууб, суула къобханларында Гюрюлдеуюк элде кёпюрню суу алгъан эди. Ол машина джюрюген кёпюр болгъаны себебли, элни джамагъаты бек джунчугъанды, элни, районну башчыларына тилекчи болуб, джарсыуларын да билдиргендиле. Аланы тарыгъыуларыны тамалында чачылгъан кёпюрню ишлерге кесамат этилгенди. Бусагъатда кёпюрню тамалы джарашдырыла турады. Саулай да 1,4 километр узунлукъгъа асфальт тёшелликди.
Евгений Гордиенко кёпюрню ишлеуню не къадар къысха заманнга бошаргъа эмда суу ётерик уллу быргъыланы сметада белгиленнгенден эсе кенгиреклерин хайырландырыргъа буйрукъ бергенди.
Кёпюрню къурулушуна керекли материалла – къурч багъанала, суу ётерик быргъыла – алына турадыла, аны абыстол (ноябрь) айны 1-не ишлеб бошар мурат барды.