Алийланы Умар атлы Къарачай-Черкес кърал университетни тамалында къуралгъан, Къарачай-Черкес Республиканы фахмулу сабийлерине кёлтюргючлюк этген «Талант и успех» деген  аралыкъ, экономиканы баш школуну лицейи бла бирге джайгъы гуманитар-математика школну къурагъанды.

 Анда республиканы фахмулу сохталары билим алгъандыла.
«Быйыл гуманитар-математика школ ючюнчю кере ишин бардырады. Бизни республикадан, окъууда уллу джетишимле кёргюзген, юч сабий къошулгъан эди анга. Школну тамалында бардырылгъан ишлени баш борчлары фахмулу, билимли сабийлени математика джаны бла билимлерин игилендириудю, санларын чыныкъдырыуду. Аны тышында да излеу-тинтиу ишле бла кюреширча билим да аладыла сабийле. Мени кёлюме келген бла, окъууну быллай болумда джарашдырыу сабийлеге уллу хайыр береди, билим алыргъа тырмашдырады. Джыл сайын да бизни сохталарыбыз гуманитар-математика школну ишлеб тебреригин ашыгъыб сакълайдыла», - деб хапар айтады КъЧКъУ-ну физика-математика факультетини математика анализ кафедрасыны тамадасы Лайпанланы Зульфия.
Ол айтхандан, школда Москва шахардан да 30 фахмулу сабий окъуйду. Зульфия чертгенден, окъуу программа Москва шахарда экономиканы баш школуну лицейини устазлары бла бирлешликде къуралгъанды.
Сохтала эки ыйыкъны, баш кёлтюрмей, окъуйдула, артыкъ да математикагъа уллу эс бёлюнеди. Теорияны тышында да устазла сохтала бла тюрлю-тюрлю мастер-классла бардырадыла, сынам алыу джанына да уллу эс бёлюнеди. Аллай ишле берилген билимлени бегитирге уллу себеблик этедиле.
Школну окъуучулары бош заманларын да хайыр бла ётдюредиле, тюрлю-тюрлю джарыкълыкъ ишле бардырылгъан джыйылыулагъа да джюрюйдюле, кёрмючлеге, музейлеге барадыла.
ХУБИЙЛАНЫ Фатима.
 
{jcomments}