Эресейни Эл мюлк министерствосу джыл сайын кърал дараджада тюрлю-тюрлю эл мюлк кёрмючле бардыргъанлай турады.

Элия (июль) айны 11-де «Сабанны Бютеуэресей кюню» деген уллу аграр-техника кёрмюч болуб ётгенди. Анга бизни республикабызны Эл мюлк министерствосуну келечилери да къошулгъандыла. Къарачай-Черкес Республикадан баргъан делегациягъа КъЧР-ни эл мюлк министри Боташланы Анзор башчылыкъ этгенди.
«Быйыл кёрмюч, элия айны 10-дан башлаб, 12-не дери, Ленинград областны Пушкин атлы шахарында ётгенди. Аны къууанч халда РФ-ны эл мюлк министри Дмитрий Патрушев бла Ленинград областны губернатору Александр Дрозденко ачхан эдиле», – деди КъЧР-ни Эл мюлк министерствосуну келечиси.
Ол билдиргенден, кёрмючде къралыбызны аграр-промышленность комплекс предприятиелерини джангы чыгъаргъан продукциялары эмда техникасы кёргюзюлгенди, бютеулей да 800 джангы техника. Сабанлада урунурча техниканы не тюрлюсю да бар эди. Кёрмючге къошулгъанлагъа 70-ге джууукъ трактор, къаладжюк, культиватор, сеялка дегенча техниканы сабанлагъа чыгъарыб аланы къалай ишлегенлерин да кёргюзген эдиле. Анда Петербургну трактор заводу джангы чыгъарыб башлагъан «Кировец К-7» трактор да болгъанды.
Кёрмючню тамалында, 2019-чу джыл Эресейде сабанлагъа урлукъ атыу бла битим джыйыуну эсеблерине аталыб, уллу кенгеш да бардырылгъанды. Кенгешде РФ-ны Эл мюлк министерствосуну тамадалары эмда кёрмючге къошулгъан делегацияланы келечилери къралны эл мюлкюн айнытыуну джолларын белгилегендиле.


(Бизни корр.).

 
{jcomments}