Къайсы бир халкъны да тамалын юйдеги къурайды. Юйдеги не къадар кючлю болса, кърал да аллай бир кючлю болады.
Бу затланы юслеринден айтды КъЧР-ни Башчысы Темрезланы Рашид элия (июль) айны 8-де Черкесск шахарны Маданият къаласында юйдегини, сюймекликни, кертиликни кюнюне аталгъан къууанчны ача.

Къууанч джыйылыугъа РФ-ны Президентини ШКФО-да Толу эркинликли келечисини Аппаратыны КъЧР-де Баш федерал инспектору Игорь Дральщиков, Къарачай-Черкес Республиканы Халкъ Джыйылыууну (Парламентини) депутатлары, КъЧР-ни Правительствосуну келечилери, республикада шахар округланы эмда муниципал районланы башчылары, Къарачай-Черкесияны шахарлары бла эллеринден юйдегиле дагъыда башхала къошулгъандыла.
Байрамгъа 25 джылдан аслам заманн ы бирге джашаб, юлгюлю сабийле бла туудукъла ёсдюрюб тургъан атала бла анала, бютеулей 25 юйдеги, чакъырылгъан эдиле.
- Юйдеги хар адамны джашаууну баш къылчыгъыды. Не заманда да юйдегиле сюймекликни, эркишиле бла тиширыуланы бир-бирлерин багъалатыуну, бир-бирлерине керти болууну тамалында къуралыб келгендиле. Юйдеги – ол миллет шартланы, адебни-намысны, отджагъада джылыуну сакълаучу, къралларын, халкъларын сюйген сабийле ёсдюрюучю уяды. Аны алайлыгъын бизни республикада да кёрюрге боллукъду. Юйдегини сыйын, намысын сакълау, аны хурметин кёрюу адетле бизде артыкъ да бек кючлю сакъланадыла. Аны себебли Къарачай-Черкесияда кёб джылланы бир-бирлерин сюйюб джашагъан эмда акъыллы, билимли, адебли-намыслы, ишленмекли эки, андан да аслам сабий ёсдюрген юйдегиле аз тюлдюле.
Бюгюн ала ёсдюрген сабийле, джетиб, республиканы джер-джеринде санагъат устала, кърал къуллукъчула, къралны патриотлары болуб турадыла. Эм аламаты – ала да, ата-аналарыча, сюймекликни, кертиликни тамалында кючлю бирикген юйдегиле къураб, адебли-намыслы сабийле ёсдюредиле. Къралны, республиканы тамбласыны тутурукълары да ала боллукъдула, - деди Башчы Темрезланы Рашид.
Андан ары сёзюнде Къарачай-Черкесияны Башчысы республиканы властлары юйдегини, ананы, сабийни къоруулар, адамларыбызны джашауларын игилендирир, келир тёлюле джюрек токълукъда джашар болумла къурар ючюн кюрешгенлерин айтды. Ол бу айтханларына шагъатлыкъгъа арт джыллада республикада джангы социал, медицина, билим бериу учреждениеле ишлеуге, джаш юйдегилеге таймаздан тюрлю-тюрлю болушлукъла этилиб тургъанларын да чертди. Темрезланы Рашид ол кюн джазыуларын бир этиб, джангы юйдеги къурагъан джаш адамланы да тойлары бла алгъышлады.
КъЧР-ни Башчысы кёб сабийли эмда ата-анадан джакъсыз къалгъан сабийлени алыб асырагъан юйдегилеге да уллу бюсюреу этиб, джюрек разылыгъын билдирди. Темрезланы Рашид бирге 25 джылдан аслам заманны джашагъан эмда экиден аслам юлгюлю сабий ёсдюрген атала бла аналагъа «За любовь и верность» деген медалны бере: «Биз да сизни бла махтанабыз, сизни бла бек ёхтемленебиз», - деди.
Ол саугъагъа тыйыншлы болгъанланы арасында Тотуркъулланы Рамазан бла юй бийчеси Шахризада бар эдиле. Ала бирге 43 джылны джашайдыла, 4 сабийни эмда аладан туугъан да 7 туудукъну ёсдюредиле. Андан сора Гапполаны Умар бла аны юй бийчеси Фатима да - экиси бирге 43 джылны джашайдыла, 3 сабийни ёсдюргендиле, 6 туудукълары да барды. Дагъыда Алчакъланы Ханафий бла юй бийчеси Алина, Байрамукъланы Борис бла юй бийчеси Фатима, Джазаланы Осман бла юй бийчеси Светлана да башында сагъынылгъан медалгъа эмда башха багъалы саугъалагъа ие болгъандыла.
Къууанч джыйылыуну аягъында Черкесск шахарны чыгъармачылыкъ юйюню джырлау эмда тепсеу джыйымлары, концерт кёргюзюб, къууанчха келгенлеге кёз ачдырдыла. Алай бла байрам, саугъаланнганланы эслеринде кёб заманны унутулмай турурча, джарыкъ ётдю.
  БАТЧАЛАНЫ Фатима.
 
{jcomments}