Никкол (июнь) айны 22-де Черкесскеде Ёмюрлюк от мемориалны къатында, Эресей Федерация бла Къарачай-Черкесияны гимнлери согъулуб, уллу митинг ачылгъан эди. Ол Эсгериу бла бушуу кюннге аталыб бардырылды.
  Ары келгенлени арасында Къарачай-Черкес Республиканы Башчысы Темрезланы Рашид, Къарачай-Черкесиядан Федерал Джыйылыуну Федерация Советини члени Салпагъарланы Ахмат, КъЧР-ни Баш сюдню председатели Семенланы Руслан, Къарачай-Черкесияны Халкъ Джыйылыууну (Парламентини) депутатлары, Правительствосуну членлери, кюч эмда джорукъ сакълагъан структураланы коллективлери, Черкесскени мэри Руслан Тамбиев, дин къуллукъчула, башхала да бар эдиле.
  Темрезланы Рашид алайгъа джыйылгъанланы алларында сёлешди.
  «Биз бюгюн 1941-чи джылны никкол (июнь) айыны 22-чи кюнюн эсгерирге джыйылгъанбыз. Ол кюн, Уллу Ата джурт къазауат башланыб, миллионла бла адамланы джашауларын тюрлендириб, хар юйдегиге къыйынлыкъ келтиргенди.
Биз ол къыйын кюнлени унутмагъанбыз. Болгъан затны эсибизде тутуб, сабийлерибизге, туудукъларыбызгъа айтханлай турабыз. Ала бизни ата-бабаларыбыз Уллу Хорламгъа джетер ючюн къаллай бир къыйынлыкъ кёргенлерин, къаллай бир адам ёлгенин билирге борчлудула. Уллу Ата джурт къазауатны тюрлю-тюрлю фронтларында джанларын-къанларын аямай, гитлерчи фашистле бла сермешгенлени, тылда уруннганланы, къазауатдан сора чачылгъанны аякъ юсюне салгъанланы сыйларгъа, эсгерирге керекдиле. Багъалы ветеранла, сизге джюрек разылыгъымы билдиреме. Сизни этген джигитлигигиз бизни барыбызгъа да юлгюдю, сыйды. Бизни джюреклерибизни джангы джетишимлеге, хорламлагъа учундурады», - деди республиканы Башчысы.
Уллу Ата джурт къазауатны ветеранларыны атындан Евгений  Николаевич Мареев  сёлешди.
«Бюгюн биз сыйлы борчларын толтура, Ата джуртларын къоруулай, джан бергенлени эсгеребиз. Къазауатда, концлагерледе, ачдан-джаланнгачдан, джауну тылында ёлгенлени барына да бушуу этебиз. Бизни республиканы адамлары, уллу къралыбызны болгъан халкъларыны  келечилери, биригиб, гитлерчи фашистле бла сермеше, джигитлик танытыб, Уллу Хорламны джууукълашдырыргъа энчи юлюш къошхандыла. Адам, башха замандача болмай, бу кюнде, къралыбызда мамыр джашау орун алыб турур ючюн къолдан келгенни аямай кюреширге кереклисин бек сезеди», - деди Уллу Ата джурт къазауатны ветераны.
Андан сора Къарачай-Черкесияны джаш тёлюсюню атындан аскер-патриот юретиу аралыкъда окъугъан Аида Килба эмда башхала сёлешдиле.
Къарачай-Черкес Республика «Горсть памяти» деген Бютеуэресей аскер патриот акциягъа къошулгъанды. Ол Уллу Хорламны 75-джыллыгъына хазырланыугъа аталыб бютеу къралда бардырылады.
Митингге келгенле Ёмюрлюк от мемориалгъа эмда Совет аскерчини эсгертмесине гокка хансла салдыла.
Ол кюн дагъыда талай ашхы иш  бардырылды.
ЛЕПШОКЪЛАНЫ Хусеин.
 
{jcomments}