Бу кюнледе Къарачай-Черкесиягъа «РусГидро» ПАО-ну баш директору Николай Шульгин келди. Къарачай-Черкес Республиканы Башчысы Темрезланы Рашид бла Николай Шульгин республикабызны электрокъууатыны ёсюмюню сорууларына къарадыла эмда бусагъатха дери этилген кесаматланы джашаугъа сингдириуню юсюнден сёлешдиле.
Тюбешиуню кёзюуюнде Темрезланы Рашид чертгенден, Къарачай-Черкесия бла «РусГидро» эртдеден нёгерледиле. Аны кючюнден республиканы джеринде уллу объектле ишленнгендиле. Электрокъууат берген Эресейде биринчи объект, Зеленчук ГЭС-ГАЭС, ачылгъанды.
Ол кече-кюн да электрокъууат бергенлей турады. Уллу Зеленчук сууда да гитче электростанция хайырланыугъа берилирге хазыр болгъанды. Энтда да 50 МВт кючю болгъан эки гитче Красногор ГЭС ишленникди. Дагъыда талай иш баджарыллыкъды.
Николай Шульгин алайда джыйылгъанлагъа бу проектни джашаугъа сингдириуде джетишимле теджеди.
«Джангы гитче ГЭС-лени этилгенлерини кючюнден, республикагъа керекли электрокъууатны 50 процентин баджарлыкъбыз. Кёб болуб джыйылгъан суу, Къобанны сууу аз болса да, бирча таб болум къураб турлукъду. Биз эмда Къарачай-Черкесияны Башчысы Темрезланы Рашид джашаугъа кийирирге излеген бу проектибизни ишине уллу къыйын салабыз. Бирге этиб башлагъан бу къыйын ишибиз мындан ары да уллу кюч излерикди», - деди Николай Шульгин.
Былайда ишленник хар гитче ГЭС-ни 25 МВт кючю боллукъду. Орта тергеу бла джылына 83,8 миллион кВт электрокъууат берликди. План бла белгиленнгеннге кёре джангы гитче электростанция хайырланыугъа 2021-2022-чи джыллада берилликди.
Къарачай-Черкесияны Башчысы Темрезланы Рашид, объектни фундаментине биринчи бетон къуюлгъан джерде, джыйылгъан миллетни аллында сёлеше, алгъы бурун «РусГидро» компанияны баш директору Николай Шульгиннге, компанияны Къарачай-Черкесияны джеринде бардыргъан инвестицион ишлери ючюн, джюрек разылыгъын билдирди.
«Биз 2016-чы джыл, былайдан узакъ болмай, Эресейде башхагъа ушамагъан гидротехника объектни - Зеленчук ГЭС-ГАЭС-ни - ачхан эдик. «РусГидро» компания этиб башлагъан проектине джууаблы кёзден къараб, аны толусу бла толтургъанын танытханды. Заманны излемине джууаб берген джангы гидроэлектростанцияны ишлениб башланнганы Къарачай-Черкесияны, Шимал Кавказ федерал округну, бютеу Эресейни джеринде энергетиканы ёсюмюне уллу атламды.
Къарачай-Черкесияны гидроэнергетиканы ёсдюрюр кючю уллуду. Биз ол кючню «РусГидро» компания бла бирге хайырландырлыкъбыз».
Регионну Башчысы, «РусГидро» компаниягъа, социал проектлени джашаугъа киргизирге болушуб, республиканы ёсюмюне энчи юлюш къошханы ючюн да разылыгъын билдирди.
«Мен республиканы кърал органлары бла «РусГидро» ПАО-ну арасында байламлылыкъ иги, хайырлы болгъаннга санайма, ол экономиканы ёсдюрюрге болушхан огъур кючдю. «РусГидро» бюгюнлюкде кърал властны органларына керти ышаннгылы нёгерди. Ол кесини бойнуна алгъан борчларын толусу бла толтурады. Биз мындан ары да быллай къурулушла бардырлыгъыбызгъа мен ийнанама. Бизни джашаугъа сингдириллик бир талай проектибиз барды», - деди Темрезланы Рашид.
«РусГидро» ПАО-ну баш директору кеслерини эмда тамадалары ала бла биригиб ишлеген башха регионланы проектлерин да джашаугъа киргизирге кюрешириклерин айтды.
«Бюгюнлюкде Къарачай-Черкесия бла компанияны арасында этилирге керекли ишлени юсюнде биз бир-бирибизни толусу бла ангылайбыз», - деб черти ол.
Къарачай-Черкесияны Башчысы Темрезланы Рашид бла «РусГидро» компанияны баш директору Николай Шульгин джангы ишлениб башланнган ГЭС-ни тамалына биринчи бетон къуйгъандан сора, заманны капсуласын бегитиб, табличкагъа къол салдыла.
Алайда джангы гитче ГЭС-лени къурулушун бардырыу республикада электрокъууатны кёб этерге мадар бергени чертилди. Джангы гидроэлектростанцияла электрокъууат бергенден сора да, кеслерини суу джыйылыб болгъан кёллерини кючюнден, Къобанда сууну аз-кёб болгъанын бирча тутарыкъдыла. Ол Зеленчук ГЭС-ГАЭС-ни 70 МВт-гъа дери кючюн къыш, джай да бирчаракъ тутаргъа болушурукъду. Энгишгеде Къобан суу бла хайырланнганлагъа да таб болум къураллыкъды.
Джангы гитче ГЭС-лени къурулушуну юсюнде инвестицион проектни джашаугъа сингдириу, бергеледен республиканы бюджетине тюшген хайырны кёлтюрлюкдю. Аны тышында джангы объектледе джюзле бла иш орунла ачыллыкъдыла.
Лепшокъланы Хусеин.
