КъЧР-ни Правительствосуну Юйюнде, республикада Джоллада джюрюуню къоркъуусузлугъун сакълауну комиссиясыны кёзюулю джыйылыуу болду. Аны Правительствону Председатели Озов Аслан бардырды.
Джыйылыуну ишине КъЧР-ни ич ишлерини министри Игорь Трифонов, КъЧР-ни Промышленностуну, Сатыу-алыу ишлерини, Саулукъ сакълауну, Окъуу бла илмуну, Туризмини, курортларыны эмда джаш тёлю политикасыны министерстволарыны, полицияны джоллада къоркъуусузлукъ сакълауну бёлюмлерини, муниципал къуралышланы, регионал автошколланы келечилери да къошулдула.
Ич ишлени министерствосунда УГИБДД-ны тамадасы Владимир Кушнарёв быйылны биринчи кварталында джоллада болгъан аварияланы эмда аланы болдурмаз джанындан баджарылгъан ишлени юслеринден толу хапар айтды. Гитче Къарачай, Адыге-Хабль, Ногъай, Джёгетей Аягъы районлада алгъындан эсе кёб чарпыула болгъанларын айырыб чертди.
- Биз ачыкълагъаннга кёре бир къауум джорукъланы сакъламагъандан чыгъадыла ол затла. Аланы арасында машиналаны джолгъа асыры джууукъда тохтатыб туруу, джолла айырылгъан джерледе дженгилирек озаргъа излеб, бир-бирине кёзюу бермеу, кесини джанында келе тургъан машинаны аллына чыгъыу, ичиб рулгъа олтуруу, джаяу джюрюгенле ётюучю джерледе, аланы озмагъа къоймау, транспортну асыры дженгил джюрютюу дагъыда башха чурумла бардыла. Регионла арасы джоллада иелери бошлаб къойгъан малла алларына чыгъыб къалыб, алай бла да боладыла чарпыула, - деди кесини сёзюнде Владимир Кушнарёв.
Джыйылыуда аварияланы адам чарпыуланы аз этерге джораланнган мадарланы юслеринден да айтылды. Аладан эм башы «Безопасные и качественные автомобильные дороги» деген миллет проект болгъаны да чертилди. Анга къошулады «Безопасность дорожного движения» деген федерал проект да.
- Проектни баш борчларыны бири джоллада джюрюуню мадарлары бла джорукъларын къурауду. Аны бла байламлы Къарачай-Черкес Республикада келишмеген затланы фотовидео суратлагъа тюшюрюб барырча таблыкъ къурауду. Бюгюнлюкде бизде 70 аллай комплекс барды. Ала бла хайырланыб, 50415 адам джорукъну бузгъанлары ачыкъланнганды биринчи кварталда. Барына да административ халда айыб салыннганды, - деди докладчы.
Аппаланы Билял.
