РусГидро бла Къарачай-Черкесс Республикада Петербургда бардырылгъан халкъла арасы форумну тамалында Красногор гитче ГЭС-лени къурулушуну проектин джашаугъа киргизирге деб, Къарачай-Черкесияны Башчысы Темрезланы Рашид бла РусГидрону баш директору Николай Шульгин кесаматха къол салгъандыла.
Алайда Темрезланы Рашид республиканы экономикасын ёсдюрюрге эмда джетмеген электрокъууатны толтурургъа проектни уллу магъанасы болгъанын айтханды.
«Республиканы джеринде быллай проектлени къурулушларын бардырыу джангы иш орунла ачаргъа, джетмеген электрокъууатны толтурургъа мадар берликди», - деб чертгенди Къарачай-Черкесияны Башчысы.
Джангы гидроэнергетика проектге кёре МГЭС-1 эмда МГЭС-2 деген эки гитче Красногор гидроэлектростанцияланы къурулушу бардырыллыкъды. Хар гитче ГЭС-ни кючю 24,9 МВт боллукъду. Планнга кёре джангы гидроэлектростанцияла 2021-чи – 2022-чи джыллада хайырланыугъа берилликдиле. РусГидро Красногор ГЭС-лени къурулушун бу айда башларыкъды.
РусГидро, къол салыннган кесаматны тамалында, Къобан сууда Красногорка ГЭС-леге керекли сууну джыйгъан джерлени хазырларгъа, джарашдырыргъа сёз бергенди. РусГидро социал джууаблы компания болгъаны себебли, Къарачай район бла Джёгетей Аягъы районну суу бла баджаргъан системаны къураугъа джораланнган ишлеге джоюллукъ ачханы бир кесегин да бериб, техника джаны бла болушлукъ этерге да къошуллукъду.
Бизни республика да, суу джыйыллыкъ, джерни джарашдырыу ишлени бардырыргъа болушурукъду.
Красногор МГЭС-лени проектине кёре гидроэлектростанцияланы эки мекямы ишленникди. Узунлугъу 148 метр, мийиклиги 31,4 метр болгъан бетон плотина салынныкъды. Сууну онг джагъасын сакълагъан дамбаны узунлугъу 475 метрге джетерикди. МГЭС-ни хар мекямында 12,45 МВт кючю болгъан, 24,9 метр мийикликден келген, суу баргъан лопастлары, гидротурбиналары болгъаг экишер гидроагрегат салыннгыкъды.
Джангы гидроэлектростанцияла электрокъууат чыгъаргъандан сора да, суу джыйгъан джерлени кючюнден, Къобан сууну бирча тутарча мадар къурарыкъдыла.
РусГидро Къарачай-Черкесияны гидроэнергетикасыны ёсюмюне терен эс бёледи. Бу компания 2016-чы джыл Зеленчук ГЭС-ни эки агрегатын, 2018-чи джыл Уллу Зеленчук сууда гитче ГЭС-ни хайырланыугъа бергенди. Бусагъатда Джёгетей Аягъы МГЭС-ни къурулушу бардырыла турады.
