Бу кюнледе Черкесск шахарда «Рак аурууну профилактикасы эмда аны эртде сезиу» деген IX-чу Евразия семинар ётдю. Ол къуру онколог врачлагъа болуб къалмай, башха профилли саулукъ бакъгъан къауумгъа да теджелген эди. Джыйылыуда къралны талай регионундан онколог устала, профессорла сёлешгендиле.
Анда, тышындан келген устала онкология аурууладан алкъын аурумагъан адамланы саулукъларын башха устала тинтиб къарагъан заманда, ол аман аурууну шартларын эртде билирге боллугъун эмда тамырларын терен ийгинчи, профилактика халда, ол аман аурууну къаушатыргъа мадар болгъаныны юсюнден эс бёлюб сёлешдиле.
Рак ауруулагъа къаршчы Евразия фондну ачхан эмда Онкология тинтиулени евразия советин къурагъан пластика хирург Субраманиан Сомасундарам джыйылыуда Къарачай-Черкесияны врачларыны кёб сейир затха кёзлерин ачды.
- Бюгюнлюкде медицинаны аурууланы багъар джаны бла кёб тюрлю джангы мадарлары къуралгъанлай баргъанларын барыбыз да кёребиз. Алай болса да, эшек гуммос ауруугъа къаршчы кюреш кёб джылланы узагъында барады. Бу аман ауруу заманында, эртде огъуна тинтилиб, ачыкъланса, аны багъаргъа, ёсгенин тохтатыргъа хыйсаб табаргъа да тынч боллукъду. Аны бла бирге ол ауругъан адамны да джашаууна ышанмакълыгъы сакъланныкъды. Ол затлада онкологладан алгъа медицина учреждениеледе башха усталаны болушлукълары бек керек боллукъду. Бу семинарны да медицина санагъатда ишлегенлени барысына аталгъаны да аны ючюндю. Бюгюннгю медицинаны излемине кёре хар неси да таб джарашхан Къарачай-Черкесиядагъы онкология диспансерча Эресейни кёб джеринде джокъду. Аны себебли сизни республикада бу аруугъа къаршчы кюрешни мийик дараджагъа чыгъарыргъа ышанырчады, - деди хирург Субраманиан Сомасундарам.
Пластика уста айтхандан, онкология аурууну арт джыллада кенг джайылыб баргъаны миллетни заманында ол затладан хапарлы болмагъанынданды. Аны бла да къалмай, ауругъан адамны саулугъун тинтген врачланы арасында онкология джаны бла билимлери да, сынамлары да тыйыншлы устала аз болгъанларында да эсленнгенин чертиб айтды пластика хирург. Башында сагъынылгъан аурууну заманында ачыкълар ючюн, адамла хар джыл сайын бир кере диагностиканы ётерге амалсыз кереклисин да эс бёлюб айтдыла.
Магъанасы уллу болгъан бу семинаргъа келген эксперт устала Къарачай-Черкесияда никкол (июнь) айны 16-на дери турлукъдула. Ала джергили медицина усталагъа дерсле берликдиле, талай хирургия операция да этиб усталыкъларын кёргюзюрюкдюле.
Кемалланы Фатима.
