Бу кюнледе Къарачай-Черкес Республиканы Халкъ Джыйылыууну (Парламентини) 55-чи пленар кенгеши болду.
Анга спикер Александр Иванов башчылыкъ этди. Сессияны ишине республиканы Башчысы Темрезланы Рашид да къошулгъан эди. Бу джол депутатла 9 соруугъа къарадыла.
Депутатла, законнга кёре, КъЧР-ни Халкъ Джыйылыууна (Парламентине) депутатла сайлауну кюнюн белгиледиле. Къарачай-Черкесияны Халкъ Джыйылыууна депутатла быйыл къыркъаууз (сентябрь) айны 8-де сайланныкъдыла.
«Об основных гарантиях избирательных прав и права на участие в референдуме граждан Российской Федерации» деген Федерал законну 10-чу статьясыны тамалында Эресей Федерацияны субъектини кърал властына депутатла сайлаугъа бегим, чёб атыу кюннге дери 100 кюнню алгъа, 90 кюнден кечге къалмай, алынады. Бегим алыннгандан сора, 5 кюнден кечге къалмай, ол кёбчюлюк информацияны мадарларында басмаланыргъа керекди.
Кенгешде КъЧР-ни финанс министри теджеген «О республиканском бюджете Карачаево-Черкесской Республики на 2019 год и на плановый период 2020 и 2021 годов» деген законну, тюрлениулери бла, депутатла къабыл кёрдюле. Республиканы бюджетини хайыр джаны быйыл 196 764,3 минг сомгъа ёсюб, 25 331 055,7 минг сом болгъанды.
Саулукъ сакълау, маданият, промышленность бла сатыу-алыу, эл мюлк, миллет ишлени, кёбчюлюк коммуникацияла бла басманы хакъындан министерстволагъа, къурулуш бла фатар-коммунал мюлклени, урунуу бла социал ёсюмню министерстволарына быйыл аслам ачха джоюлгъанды.
Аны бла байламлы республикан бюджетни джоюлгъан джаны быйыл 196 764,3 минг сомгъа ёсюб, 25 457 781,7 минг сом болгъанды.
Андан сора депутатла «О дорожном фонде Карачаево-Черкесской Республики» деген законнга тюрлениуле кийирген проектни алдыла. «Особенности регулирования земельных отношений в Карачаево-Черкесской Республике» деген законну тюрлендирген законопроектин да къабыл этдиле. Ол законопроект Эресей Федерацияны Къарачай-Черкесияны джеринде джашагъан адамларына, аланы джерлерин кёб этиб, эл мюлклерин кенгертирге мадар береди.
Сессияда депутатла дагъыда башха соруулагъа къараб, алагъа тыйыншлысыча оноу этдиле.
Узеирланы Хусей.
