Къарачай-Черкесияны Башчысы Темрезланы Рашид, Гитче Къарачай районну администрациясыны тамадасы Байрамукъланы Рамазан бла ишчи тюбешиу бардырыб, муниципалитетни социал-экономика ёсюмюне къарагъанды.

Тюбешиуню кёзюуюнде Байрамукъланы Рамазан республиканы Башчысына районну территориясында, быйыл ишлениб, хайырланыугъа бериллик социал магъаналы объектлени юслеринден хапар айтханды. Аланы ичинде Терезе элни Культура юйю, Ючкекен элни Къамыш Къулакъ тийресинде 200 сабийге деб ишлене тургъан джангы сабий сад бардыла.

Ол садик хайырланыугъа берилсе, дегенди районну башчысы, элни школгъа дериги сабий учреждение кереклиси толусу бла баджарыллыкъды.

Темрезланы Рашид бла Байрамукъланы Рамазан Гитче Къарачай районну территориясында уллу медицина кластерни инвестицион проектини къурулушун бардырыу бла байламлы ишлени да сюзгендиле.

Ол медицина кластер Россияда ата джуртлу эмда тыш къраллы эм иги, эм алчы практикаланы, илму, медицина, билим, реабилитация джетишимлени хайырландырлыкъ биринчи проект боллукъду. Ол, Краснокурган элде ишлениб, 231,7 гектар джерни аллыкъды.

Республиканы Башчысы бла районну тамадасы джашау магъаналы дагъыда башха ишлеге къарагъандыла. Ючкекен элде 7-чи номерли школгъа реконструкция этиу бла район аралыкъда инженер сетлени къурулушларын бардырыу бла байламлы ишле аланы бир къауумудула.

Темрезланы Рашид Гитче Къарачай районну башчысыны ишин игиге санагъанын айтханды. Аны себеби мында социал-экономика тутхучлу ёсе барады.

 
{jcomments}