Черкесскени Маданият юйюнде Эресей Федерацияны Миллет гвардия аскерлерини кюнюне аталгъан къууанч джыйылыу болгъанды.
Ол джыйылыугъа келгенлени арасында Къарачай-Черкес Республиканы Башчысы Темрезланы Рашид, Халкъ Джыйылыууну (Парламентини) Председатели Александр Иванов, Правительствосуну Председатели Аслан Озов, республиканы Халкъ Джыйылыууну депутатлары, закон-джорукъ сакълагъан структураланы, властны федерал органларыны бёлюмлерини тамадалары Эресей гвардияны аскерчилери башхала бар эдиле.
Залгъа Эресей Федерацияны Кърал байрагъы бла Эресейни Миллет гвардиясыны аскерлерини байрагъын кийиргенлеринден сора, Эресей бла Къарачай-Черкесияны Кърал гимнлери согъулдула.
Эресей Федерацияны Миллет гвардиясыны аскерлерини Башчысы, аскерни генералы Виктор Золотов джыйылгъанланы алгъышлады.
«Бизни къралны тарихи 200 джылдан артыкъ заманны законну сакълагъан аскерле бла байламлыды. Ала хар кёзюуде да Ата джуртха кертиликлерин таныта ишлегендиле. Бюгюнлюкде да бизни аскерчилерибиз, къуллукъчуларыбыз джамагъатны къоркъуусузлугъун сакълай, тири джумушла бардыра, къолларындан келгенни этгенлей турадыла. Шахарлада, элледе мамыр джашау орун алыб турур ючюн, ала джанларын-къанларын аямайын кюрешедиле», - деди аскер генерал Виктор Золотов.
Андан сора Къарачай-Черкес Республиканы Башчысы Темрезланы Рашид Эресей гвардияны аскерчилери бла ветеранларын, аланы санагъат байрамлары бла алгъышлаб, талай джылы сёз айтды.
«Федерал къуллукъну уллу магъанасы болгъан баш ишлерини бири къралны ич къоркъуусузлугъун сакълауду, экстремизмге, терроризмге башха орун алгъан аманлыкълагъа къаршчы ишлеудю. Бу джаны бла Эресей Федерацияны Миллет гвардия аскерлерини Федерал къуллугъуну КъЧР-де управлениеси, республикада бирча таб болум орун алыб турур ючюн, кёб тюрлю иш баджаргъанды. Управлениени къуллукъчулары этген джумушла регионну социал-экономика ёсюмюне да тири джюрюш бередиле. Ала властны органлары бла, законну сакълагъан башха органла бла да биригиб ишлейдиле. Къарачай-Черкес Республика Шимал Кавказ федерал округну эм рахат, къоркъуусуз регионуду, дерге боллукъду», - деди Темрезланы Рашид.
Регионну Башчысы чертгенден, Эресей гвардияны Къарачай-Черкесияда управлениесини кадр къурамы бек кючлюдю, бусагъат заманны излемине келишген техника бла да баджарылгъанды.
Темрезланы Рашид Эресей гвардияны республикада управлениесини аскерчилерин, тамадаларын, башха къуллукъчуларын, Къарачай-Черкесияда мамыр джашау орун алыб турур ючюн, джанларын-къанларын аямай кюрешгенлерин айта, санагъат байрамлары бла алгъышлады. Алагъа кючлю саулукъ, рахатлыкъ, къралны къоркъуусузлугъун сакълауда джангы джетишимле теджеди.
Андан сора Башчы Управлениени къуллукъчуларына «Къарачай-Черкесияны махтаулу юристи», «Къарачай-Черкесияны кърал къуллугъуну къуллукъчусу» деген сыйлы атла атады. Талай адамгъа Бюсюреу къагъытла да берди.
Аны ызындан Управлениени къуллукъчуларын Александр Иванов бла Аслан Озов алгъышладыла. Эресей Федерацияны Президентини Шимал Кавказ федерал округда Толу эркинликли келечисини аппаратындан КъЧР-де Баш федерал инспектор Игорь Дральщиков Управлениени къуллукъчуларына кёб джылы сёз айтды.
Джыйылыуну аягъында белгили джырчыла эмда чыгъармачылыкъ коллективле концерт кёргюздюле.
Лепшокъланы Хусеин.
