Мындан алда Къарачай-Черкес Республиканы Башчысы Темрезланы Рашид, Ставрополь крайны Губернатору Владимир Владимиров, Адыгея Республиканы Башчысы Мурат Кумпилов, Къабарты-Малкъар Республиканы Башчысы Казбек Коков Нальчикде «Кюнлю шахар» деген сабий чыгъармачылыкъ академиягъа баргъандыла.

Къонакълагъа сабийле джарашдыргъан, къурагъан затланы, мийик технологияланы кёргюзгендиле. Ол кёрмюч илму, окъуу программаны тамалында бардырылгъанды. Къабарты-Малкъар аллай затха биринчи кере къошулады.

«Кюнлю шахар» деген академияны къурамына кирген «Кванториум» технопарк бла фахмулу сабийлени лицейи да кеслери чыгъаргъан эмда башха затланы кёргюзгендиле.

Эресейни юч субъектини башчылары да чыгъармачылыкъ академияны сабийлерин къонакъгъа чакъыргъандыла. Темрезланы Рашид  бла Казбек Коков аралыкъны сабийлери Къарачай-Черкесиягъа барлыкъларыны юсюнден келишгендиле. Ала бизни республикада Зеленчук районда Эресей академияны астрофизика обсерваториясын кёрлюкдюле. «Джашил айрымканда» болгъан кёб тюрлю сейир затха къарарыкъдыла.

Темрезланы Рашид сабий чыгъармачылыкъ академияны этген затларыны уллу магъаналары болгъанларын айтханды.

«Мен бу аралыкъны ишине сейирсиниб къарадым. Эм алгъа сабийлени таукелликлерин, аланы кёзлерини джаннганларын, бир иги зат этерге излеб тургъанларын джаратдым. Сиз этген нюзюрлеригизге джетеригигизге ийнанама. Бу залда къуру Къабарты-Малкъарны тюл, Шимал Кавказны, бютеу Эресейни келлик заманыны фахмулары олтурадыла. Сиз кесигизни бютеу билимигизни, кючюгюзню республикагъызны, къралны экономикасын ёсдюрюрге берлигигизге ышанама. Быллай тюбешиулени уллу магъаналары барды. Сабийлерибиз фахмуларын тыйыншлы кёргюзюрча алагъа таблыкъла къураргъа керекбиз», - дегенди Темрезланы Рашид.

КъЧР-ни Башчысы сёзюню ахырында сабийлеге уллу джетишимле теджегенди.

 

 

 
{jcomments}