Бу кюнледе Къарачай-Черкес Республиканы Къобан районунда иги ишлеген элчилеге саугъала бергендиле.

«Бюгюн биз 2018-чи джылны ичинде эл мюлкде этилген ишлени ахыр эсеблерин чыгъарабыз. Джылны аллында салыннган борчла хазна къалмай толгъандыла. Алай болса да, бир къауум сорууну оноуу этилирге керекди. Бизни баш муратыбыз, районну джамагъатыны джашау дараджасын кёлтюрюудю. Ол джанындан биз планнга кёре ишлегенлей турлукъбуз», - деб хапар айтханды Къобан муниципал районну администрациясыны тамадасы Чомаланы Магомет.

Ол андан ары сёзюнде чертгенден, быйыл этиллик кёб иш барды. Районну адамларын иш къоллу этиуде, саулукъ сакълауда, юй-турмуш санагъатда, билим бериуде орун алгъан соруула да ары киредиле.

«Ала бары да миллет проектледе белгиленнгендиле. Районну адамларыны джашау турмушларын иги этиу, биз ол проектлеге къаллай халда къошулгъаныбызгъа кёре боллукъду.

Адамланы излемлерин толтура, районда кюн сайын орун алгъан турмуш соруулагъа терен эс бёлюнеди. Кёб сабийли юйдегиле да кёз туурададыла. Алагъа джерле бериледиле.

Бюгюнлюкде кёб сабийли 19 юйдеги джер юлюш алгъанды. Энтда да джууукъ заманда 14 юйдеги аллыкъды. Биз джамагъат бла тюбешиб, адамла не излегенлерин билиб, алагъа болушур джанындан кёб иш бардырабыз. Аллыбызда этиллик ишле да кёбдюле. Алай болса да, биз биригиб, аланы оноуларын этеригибизге мен толу ийнанама. Республиканы Башчысы Темрезланы Рашид 2019-чу джылгъа бизге салгъан иш борчланы толусу бла баджарлыгъыбызгъа мен ишексизме», - дегенди районну тамадасы.

Андан сора тюрлю-тюрлю санагъатлада джетишимли ишлеген адамлагъа Къарачай-Черкесияны Халкъ Джыйылыууну (Парламентини) Хурмет, Бюсюреу къагъытлары бла саугъалагъандыла.

Джыйылыуну аягъында алайгъа келген джамагъатха Къарачай-Черкесияны белгили артистлери концерт кёргюзгендиле.

(Бизни корр.).