РФ-ны Президенти Владимир Путинни Федерал Джыйылыугъа этген Чакъырыуунда медицинагъа да уллу эс бёлюнеди.
«Бюгюннгю халы маджалдан маджал бола, ким да аны бла эркин хайырланырча ол дараджагъа чыгъа барады. Бир джаны бла алай болгъанлыкъгъа, ол адамланы кёллерине толу джетмейди алкъын. Аны чуруму да белгилиди. Саулукъну дженгил халда хакъсыз тинтерча мадар табылмайды бирде. Иги уста врачны къолуна тюшер ючюн, талай кюнню кёзюу сакълаб турургъа керек болады. Чарх юсюнде (мобильный) медицина комплекслени саны да ёсюб барады. Ала болмагъан джерледе уа адамла инджилир ючюн къалмайдыла», - деб айтылады Чакъырыуда.
Не джаны бла да заманны излемине келишген медицинабыз болур ючюн, кърал тамада талай борч салгъанды. 2020-чы джылны аягъына медицина болушлукъ къайсы бир адамгъа да (къралны къалайында джашагъанына да къарамай) джетерча болургъа керекди. Эки джылны ичине «мобильный амбулаторный пункт» дегенледен 1,5 мингни ишлерге керекди. Поликлиникалада врачлагъа къаратыр кёзюулерин сакълаб адамла кёб туруучандыла. Ол затны къойдурур ючюн, къралны бютеу медицина учреждениелеринде «Бережливая поликлиника» деген проектни джашауда бардырыргъа тыйыншлыды. Ол иш этилсе, регистратурада да, врачны кабинетини аллында да кёзюу сакълауну заманы 3-4 кереге аз болургъа керекди. Ол проектни, сёз ючюн, Татарстанда хайырландырыб башлагъандыла.
Аны кибик, 2021-чи джылгъа бютеу сабий поликлиникаланы да джангы стандартха кёчюрюрге деб Правительствону аллында борч салгъанды Президент. Ол юч джылны ичине «электронное взаимодействие» деген лагъымны деменгили джарашдырыб врачланы, поликлиникаланы, аптекаланы, пациентлени араларында байламлылыкъны таб къураргъа кереклиси да чертиледи Чакъырыуда.
Медицинаны, ай медет, бюгюнлюкде джарсыулары аз тюлдю. Аланы сагъына, джангы мадарла теджегенди кърал башчы Чакъырыуунда. Сёз ючюн, былтыр онкология ауруулагъа къаршчы миллет программа теджеген эди Владимир Путин. Бу джол Чакъырыуда онкология ауруулагъа къаршчы ишге 1 триллион сом бёлюннюгюн айгъакълагъанды.
Реабилитация медицина джумушлада энчи орун алгъан къыйын джумушду. «Иш кёбдю», - дегенди Президент аны юсюнден. Алгъы бурун дуния дараджалы эки сабий реабилитацион аралыкъ ачылырын излегенди ол…
Медицинада, айхай да, алкъын этиллик ишле джетишедиле. Ол зат Къарачай-Черкесияда да эсленеди. Ёзге бу арт 3-4 джылны ичинде джамагъатха алчы технологиялы медицина болушлукъ бериу джаны бла кёб иш этилгенин да айтыргъа керекди. Кёб профилли сабий республикан больница, республикан онкология аралыкъ, амбулаторияла, фельдшер пунктла ачылгъандыла, джангы оборудование салыннганды, башха таблыкъла къуралгъандыла.
Ёзденланы Якъуб.
