КъЧР-де, Эресей Федерацияны бирси регионларыча, толусу бла цифралы телевидениеге кёчерге хазырланадыла. Аны бла байламлы КъЧР-ни Башчысы Темрезланы Рашид КъЧР-ни Промышленность бла сатыу-алыу министерствосундан талай ишни тындырлыгъын излегенди. Ведомство кесини кёзюулю джыйылыуунда ала къалай толтурула баргъанларына къарагъанды. Джыйылыуну Министерствону башчысы Аргунов Мурат бардыргъанды.

Ол чертгенден, Темрезланы Рашидни аманатларын толтуруу джаны бла иги кесек иш этилгенди. Сёз ючюн, цифралы телебериулени бардырыргъа хазырланыу бла байламлы республикада цифралы сеть къуралгъанды. Ол 45 станцияны бирикдиреди. Аны бла да къалмай, Черкесск шахарда мийиклиги 150 метрге джетген джангы телебашня ишленнгенди.

Республика цифралы телевидениеге кёчерге эмда аналог телевидениени ишин тохтатыргъа хазырланнганыны юсюнден муниципалитетледе джамагъатха таймаздан хапар берилгенлей турады. Ол ишни асламысына   муниципалитетлени къуллукъчулары бла КъЧР-ни РТРС-и хазырлагъан 24 волонтёр бардырады. Ала, элледе юйлеге айланыб, адамланы цифралы телевидениеге кёчерге хазыр болгъанлары бла къалгъанларын тинтедиле. Ол джаны бла болушлукъ кереклилени тизимлерин этедиле. Бюгюнлюкде муниципалитетледе цифралы телевидениеге кёчерге керекли телевизион аппаратла сатыб алырча хыйсаблары болмагъан 1246 адам болгъаны ачыкъланнганды. Волонтёрла аланы тизимлерин джазыб джарашдыргъандыла.

Алай бла, джыйылыуда айтылгъандан, республиканы цифралы телевидениеге кёчюрюуге хазырлауну   иши тыйыншлы дараджада барады.