Мындан алда Эресей Федерацияны Президенти В.В. Путин «За заслуги перед Отечеством II-ой степени» орденни медалын Къарачай-Черкесиядан Эресей Федерацияны Федерал Джыйылыууну Федерация Советини члени Салпагъарланы Ахматха берирге, деб указгъа къол салгъан эди.

Сенаторгъа ол саугъаны Эресей Федерацияны Президентини Администрациясыны тамадасыны биринчи орунбасары Сергей Кириенко бергенди.

Къарачай-Черкес Республиканы Башчысы Темрезланы Рашид Салпагъарланы Ахматны ол мийик кърал саугъаны алгъаны бла алгъышлагъанды.

«Къарачай-Черкесиядан Федерацияны Советини члени Салпагъарланы Ахматны, мийик кърал саугъа алгъаны бла таза джюрекден алгъышлайма. Анзорну джашы Ахмат белгили адамды. Ол джууаблылыгъын терен сезген, джуртуну керти патриотуду. Аны ючюн аны ол уллу саугъа бла саугъалаб, этген ишине багъа бергендиле. Салпагъар улу къралны закон чыгъарыучу базасын, Къарачай-Черкесияны социал-экономика ёсюмюн айнытыр ючюн кёб зат этеди.

Салпагъарланы Ахматха тутхан ишинде мындан ары да джетишимле, аны джууукъларына рахат джашау теджейме», - дегенди Темрезланы Рашид.

 
{jcomments}