Ол айтхандан, 2019-чу джыл Эресейде аналог телевещание юч кёзюуге бёлюнюб джукълатылыб, бу иш никкол (июнь) айны 3-де тамамланныкъды. Быйыл эндреуюк (декабрь) айны 3-де 9 сагъат бла 30 такъыйкъада Тверь областда аналог телевещаниени ишин тохтатхандыла.
2019-чу джыл байрым (февраль) айны 11-де Рязань, Тула, Ярославль, Ульяновск, Пенза, Магадан областла бла Чечен Республикада, келир джыл арттотур (апрель) айны 15-де Москвада, Амур, Иванов, Кемерово, Киров, Кострама, Курган, Липецк, Москва, Новгород, Тюмень областлада, Къабарты-Малкъарда, Къарачай-Черкесияда, Къалмукъда, Мордовияда, Сахалинде, Ставрополда, Удмуртияда, Чувашияда, Ямал-Ненец округда, никкол (июнь) айны 3-де Эресейни бирси регионларында биринчи, экинчи мультиплекслеге кирген федерал аналог телевещаниелени ишлери толусу бла тохтатыллыкъдыла.
Алгъаракъда Къарачай-Черкесияны Башчысы Темрезланы Рашид республикада цифралы телевещаниеге кёчерге хазырланыуну ишлерин дженгилирек бардырыргъа чакъыргъан эди. Ол джаны бла белгиленнген ишлени этерге Минкомсвязны, РТРС-ни, республиканы кърал властыны органларыны юслери бла кёб зат да этилген эди. Къуру КъЧР-де цифралы телевизион сигналны алыргъа 45 станция ишленнгенди.
Цифралы телевещаниеге кёчюу «Развитие телерадиовещания в РФ на 2009-2018 годы» деген федерал программаны излемини тамалында бардырылады.
Эсигизге салабыз: 2012-чи джылгъа дери сатыб алгъан телевизорлары бла хайырланнганла, мындан ары да аланы ишлетиб турур ючюн, алагъа DVB T2 приставкала сатыб алыргъа керекдиле.
Цифралы телевещание ишлеб башлагъанлай, эресейчилеге не джаны бла да асыулу джарашдырылгъан телевизион каналла алайына берилиб тебрерикдиле.
