Алайда республиканы Башчысы сабийлени ата-аналары бла да, больницаны ишчилери бла да тюбешиб, сабийлени саулукъларын багъыу ишлени къалай къуралгъанларындан хапар соргъанды. Больницаны баш врачы Лайпанланы Тамара бла ушагъында уа, сабийлени саулукъларына къарауну юсюнден аланы ата-аналарыны оюмларына, теджеулерине артыкъ да уллу эс бёлюб тынгылагъанды.
«Эресей Федерацияны Президенти Владимир Путин белгилеген миллет проектлени джетишимли тындырыр ючюн, адамла бла байламлылыкъ тутууну магъанасы бек уллуду.
Миллет проектлеге заявкала къурагъан заманда да социал эмда экономика джанындан эм алгъа эс бёлюннюк ишлени белгилей, адамланы къайгъыртыб тургъан затланы эсебге алыб, оюм этиб къарайбыз.
Кёб джылланы узагъына аллай проблемаланы бири болуб тургъан эди республиканы кесини сабий клиника больницасы болмагъаны. Сабийлени, артыкъсыз да медицинаны кёзюнден къарагъан бла къыйын ауругъанланы республикадан тышында саулукъларына къаратыргъа ашырыб тургъандыла. Энди уа аллай больницабыз барды. Алай а адамланы саулукъларын багъыуда проблемала алкъын тюбей турадыла. Биз аланы «Здравоохранение», «Демография» деген миллет проектлени ичлеринде оноуларын эте барлыкъбыз. Медицина учреждениелени керекли затла бла баджарыб, медицина ишчиле керекли болмазча этерикбиз», – деди республиканы Башчысы.
