Анга къошулгъанланы арасында Эресей Федерацияны граждан оборона бла къоркъуулу болумдан эмда андан джетген заранны кетерген министри Евгений Зиничев, Эресей Федерацияны Президентини Шимал Кавказ федерал округда Толу эркинликли келечиси Александр Матовников Къарачай-Черкес Республиканы Башчысы Темрезланы Рашид, Къабарты-Малкъар Республиканы Башчысы Казбек Коков, КъЧР-ни Халкъ Джыйылыууну (Парламентини) спикери Александр Иванов, Правительствосуну членлери, шахар округла бла муниципал районланы тамадалары, Эресейни МЧС-ни Кърачай-Черкесияда управлениесини, башха профиль ведомстволаны тамадалары бар эдиле.
Кенгешде регионну турист, къыш аякъ чаналада учар мадар болгъан курортларыны инфраструктурасыны ёсюмюню, медицина болушлукъ табдырыуну сорууларына къарадыла. Туристлени къоркъуусузлукъларына терен эс бёлюндю.
Александр Матовников курортланы юслери бла кёб къралла джашнаб баргъанларын, туризмден тюшген хайыр бюджетлерини иги кесеги болгъанын айтды.
«Шимал Кавказ федерал округну табигъат болуму, ариулугъу, башха сейир заты тыш къралланыкъыладан мийик болмаса, артха къалмайды. Округну субъектлерини аякъ чаналада учхан туристле бизге кёб келирча, ол туризмни иги ёсдюрюрча мадарлары кёбдюле. Табигъатны таблыгъы, къарны теренлиги алай айтырча мадар береди. Алай болса да, кёб адам келиб, сюйюб солурча эте, аланы солугъан джерлеринде къышхы солууну индустриясын къураргъа керекди. Ол заманда туризм округну экономикасын алгъа элтген санагъатлада биринчилени тизиминде болуб, тыйыншлы орун аллыкъды», - деди Александр Матовников.
Андан ары сёзюнде А. Матовников Эресей Федерацияны Президенти В.В.Путинни 2021-чи джылгъа дери Шимал Кавказда, туристле къыш солугъан джерлени инфраструктураларын ёсдюрюрге керекди, ол заманда округну экономикасында туризм санагъат тыйыншлы орун аллыкъды, деген аманатын джыйылгъанлагъа эсгерте, бизни регионлада дуния дараджада джангы курортла ишлениб баргъанларын айтды. Аланы сервислери, техника бла баджарылыулары дунияда быллай курортладан чыртда артха къалмагъанын билдирди.
КъЧР-ни Башчысы Темрезланы Рашид республикада курортланы ёсдюрюу баш ишлени бири болгъанын айтды.
«Арт беш джылны ичинде Къарачай-Черкес Республиканы турист базаларына келген туристлени саны 1,2 миллион адамгъа ёсгенди. Доммай бла Теберди белгили тарихлери болгъан курортладыла. «Архыз» ВТРК джангы ёсюб башлагъанды. Эресей Федерацияны Правительствосуна, «Шимал Кавказны Курортлары» деген компаниягъа, бу джаны бла туризмни ёсюмюне уллу юлюш къошханлары ючюн разылыгъымы билдиреме. Джыл сайын туристле кёбден кёб келиб барырча этиу бизни баш ишлерибизни бириди. Республикада ол зат бла байламлы структурала бла, артыкъсыз да Эресей Федерацияны МЧС-ни Къарачай-Черкесияда управлениеси бла, Эресей Федерацияны КъЧР-де Ич ишлерини министерствосу бла, Росавтодор бла, башхала бла байлам бегигенди. Бюгюнлюкде 2018-чи - 2019-чу джылланы къышхы сезонуна Къарачай-Черкесияны курортлары хазырдыла», - деди Темрезланы Рашид.
Келген туристле амалсыз регистрация этерге кереклилерини юсюнден да айтды Башчы.
«Сынам ишле кёргюзгеннге кёре, бизге келген туристледен къуру юч этиб бири регистрация этеди. Келген туристлени бары да амалсыз регистрация этилирге кереклиге санайма. Биз законну джолунда тыйыншлы болушлукъ табдырлыкъбыз», - деб чертди Темрезланы Рашид. Эресейни МЧС-ни министрини орунбасарыны борчларын толтургъан Виктор Яцуценко бюгюнлюкде курортлада къутхарыучуланы бирикген бёлеклери иги ишлегенлерин айтды. Къутхаргъандан сора да, табигъатдан джетерик заранны адамла билселе, аны уллу магъанасы болгъанын да билдирди. Ол муратха джетер ючюн амалсыз керекли затла болгъанларын эмда этилгенлерин айтды.
Евгений Зиничев кенгешни ахыр эсеблерин чыгъара, солугъанланы къоркъуусузлукъларын сакълау джанындан бир къауум аманат этди. Ала юй-коммунал мюлк бла, отлукъ-энергетика комплекс бла, отдан сакъланыу бла, газ оборудованиеле, цифралы картала бла, башха затла бла байламлы эдиле.
Темрезланы Рашид джыйылыуну аягъында, Къарачай-Черкесияны джеринде быллай амалсыз керекли кенгеш бардырыб, хар затны ачыкълаб, болушлукъ табдыргъанлары ючюн къонакълагъа бюсюреу этди.
