Росавтодоргъа бойсуннган «Кавказ» ФКУ Упрдор КъЧР-де Уллу Ставрополь каналны юсю бла А-165 Лермонтово-Черкесск трассада кёпюр ишлеб башларгъа хазыр болгъанды. 1964-чю джыл хайырланыугъа теджелген кёпюр да алай тургъанлай, аны къатында темирден 100 тонна ауурлукъну кёлтюрлюк кёпюр ишленникди.
65 метр узунлугъу болгъан кёпюр Къарачай-Черкес Республиканы ара шахарын бир-бири бла байламлы этгенден сора да, белгили Архыз, Доммай курортла эмда Кавминвод шахар бла да байларыкъды.
Бу къурулуш проектге эки тазалаучу оборудование да киреди, суу, алада тазаланыб, каналгъа андан сора тюшерикди. Аны бла да къалмай, былайда 1,8 километр суу джагъагъа да темир буруу салынныкъды, кече джарытырча электроджарыкъ берген 40 багъана да орнатыллыкъды. Алай бла кече былайда машинала къоркъуусуз джюрюрюкдюле.
Бу кёпюр ишлениб бошалса, «Кавказ» ФКУ Упрдорну усталары эски кёпюрню чачыб, аны орнуна да заманны излемине джууаб этген джангы кёпюр ишлерикдиле. Айтылгъан ишле 2019-чу джыл тамамланныкъдыла. Айтыргъа, ол заманда былайда джолну техника категориясы ёсерикди, экини орнуна ары бла бери тёрт машина бир ызгъа ётерге боллукъду.
Быйыл бизни республикада федерал джолчула Теберди эмда Муруджу сууланы юслери бла кёпюрлени хайырланыугъа теджегендиле. Аны тышында да джылны аягъына энтда талайыны къурулушун тамамларыкъдыла.
