Темрезланы Рашид КъЧР-ни Башчысы болгъанлы республиканы джамагъатына кёб иги зат этгенди. Джангы школла, сабий садла, спорт комплексле, кёпюрле ишлениб, хайырланыугъа берилгендиле. Бу арт кёзюуде уа бизни республикада джолла ишлеуге уллу эс бёлюннгенди. Сёз ючюн, бусагъатда федерал магъанасы болгъан «Черкесск-Архыз» джолну Джёгетей Аягъы районда иги кесегин толусу бла джангырта турадыла. Башхача айтсакъ, кенгертгендиле.
Мындан алда уа Красный Кургандан «Медовые водопады» турист базагъа баргъан джолну толусу бла джангыртыб, кенгертиб, анга асфальт тёшеб, хар затын деменгили джарашдырыб, хайырланыугъа бердиле. Бу джолну юсюнден кёб хапар айтханбыз. Аны узунлугъу 7,5 километрди. Зыгъыр къуюлгъан джол эди. Аны аманлыгъындан турист базагъа солургъа кёб адам келмей эди. Чунгурлары кёб эди. Джюрюген транспортну чархларындан ташла чартлаб, ары-бери озгъан машиналаны миялаларына тийиб, аланы сындырыучан эдиле. Андан сора да букъу кёлтюрюлюб, аллынгда баргъан транспортну кёрмей къоя эдинг.
Абыстол айны 16-да джол толусу бла джангыртылыб, хайырланыугъа берилди. Бу джол да КъЧР-ни Башчысы Темрезланы Рашидни кючю бла ишленнгенди. Аны ачылыууна аталыб Красный Курган элни къыйыр сюреминде уллу джыйылыу болду. КъЧР-ни Башчысы Темрезланы Рашид дагъыда башха сыйлы къонакъла келликлерин билгенлеринде, кёб адам джыйылгъан эди. Джол 12 сагъатда ачылыргъа керек эди да, ол заманнга ачылды.
КъЧР-ни Башчысы Темрезланы Рашидни биргесине РФ-ны Туризмини федерал агентствосуну тамадасыны заместители Николай Королёв, КъЧР-ни Халкъ Джыйылыууну (Парламентини) Председатели Александр Иванов, Нарсана шахарны башчысыны заместители Александр Данилов, КъЧР-ни Правительствосуну членлери, Гитче Къарачай районну администрациясыны эмда джамагъат организацияларыны къуллукъчулары келген эдиле. Алайгъа джыйылыб тургъан халкъ алагъа джылы тюбеди.
Джыйылыуну КъЧР-ни Башчысы Темрезланы Рашид ачды.
- Багъалы джамагъат! Бюгюн биз эки къууанчха джыйылгъанбыз. Экиси да бир-бири бла байламлыдыла. Биринчи къууанчыбыз Красный Курган элден «Медовые водопады» турист базагъа баргъан джол бла байламлыды. Экинчи къууанчыбыз а «Медовые водопады» турист базада Къарачай айранны 7-чи фестивалын бардырыуду. Кесигиз кёргенигизча, эки къууанчха да кёб адам келгенди. Экисини да джашауубузда уллу магъаналары болгъанына шагъатлыкъ этеди ол. Бюгюн былайгъа джыйылгъан джамагъатха кесими эмда мени биргеме келгенлени атларындан уллу салам береме, хар биригизге тынчлыкъ-эсенлик теджейме.
Сиз къууаннганча, мен да къууанама бюгюн Красный Кургандан «Медовые водопады» турист базагъа баргъан джолну ачылгъанына. Мен да, сиз да билгенден «Медовые водопады» турист база бизни къралда белгили турист комплекслени бириди. Бери солургъа бизни къралдан кёб адам келеди. Сёз ючюн, озгъан джыл мында 100 минг адам солуб кетгенди. Ол зат бизни къралда туризмге уллу эс бёлюннгенине шагъатлыкъ этеди. Бюгюн джолну ачылыууна Эресей Федерацияны Туризмини федерал агентствосуну тамадасыны заместители Николай Вадимович Королёв да келгенди. Джолну ишлениуюне аны эмда Ростуризмни башха тамадаларыны да уллу къыйынлары киргенди. Аланы барына да джюрек разылыгъымы билдиреме.
«Медовые водопады» турист базача туркомплекслени аслам этерге керекбиз республикабызда. Хар эресейчи бизни турист базаларыбызгъа келиб, зауукълу солуб кетерге керекди. Озгъан джыл республикада 1 миллион 200 минг турист солугъанды. Келир джыл андан да кёб турист солуругъуна сёз джокъду.
Красный Кургандан «Медовые водопады» турист базагъа джангы джол ишленнгенини Гитче Къарачай районнга уллу магъанасы барды: кёб иш орун ачыллыкъды. Андан сора да бери келген туристлени саны иги кесекге аслам боллукъду.
Джол ишлеучюлеге да джюрек разылыгъымы билдирирге излейме. Къысха заманны ичине къолгъа алгъан ишлерин бет джарыкълы тындыргъандыла. Бюгюн барыбыз да джангы ишленнген джолну ачаргъа келгенбиз да, ол огъур бла ачылсын! Джамагъатны къууанчлагъа, ашхы ишлеге элтиучю джол болсун! – деди Темрез улу.
Сёз Эресейни Туризмини федерал агентствосуну тамадасыны заместители Королёв Николай Вадимовичге берилгенинде ол:
- Сыйлы джамагъат! Къарачай-Черкес Республиканы табигъатыны ариулугъу кимни да сейирсиндирир ючюн къалмайды. Быллай ариу джерлеге келиб, эресейчиле солуб, саулукъларын бегитирге керекдиле. Ала алай этер ючюн кърал тамадаларыбыз кёб иш баджарадыла. Башхача айтсакъ, туризмге бизни къралда кенг джол ачарыкъдыла. Алай этер ючюн, къуру мекямла ишлениб къалмай, турист базалагъа баргъан джолла да мийик дараджалы болургъа керекдиле. Доммай, Архыз къаллай ариу джерледиле. Мындан алда Архызда болгъан эдик да, аны ариулугъу бизни сейирсиндирир ючюн къалмады. Бу сейир джерледе орналгъан турист базалагъа джолла ишлеу баш орунну аллыкъдыла. Биз мурат этген бла Пхияда да джангы турист комплекс ишленнгени бла къалмай, джол да ишленникди. Джамагъатха керекли затланы 2019-чу джыл къолгъа алыргъады муратыбыз.
Бюгюн Красный Кургандан «Медовые водопады» турист базагъа баргъан джолну ачаргъа джыйылгъанбыз да, КъЧР-ни Башчысы Темрезланы Рашид айтханча, ол огъур бла ачылсын! - деди.
Гитче Къарачай районда къартланы атларындан Хубийланы Гитче сёлешди.
- Гитче Къарачай районда 45 минг адам джашайды да, мен аланы атларындан джангы ишленнген джолну ачаргъа келген сыйлы къонакълагъа джюрегими теренинден исси салам береме, алагъа мындан ары да къууанч-насыб теджейме. Бу джангы ишленнген джол къуру бизни республикада тюл, къралыбызда да эм иги джолланы бири болгъанды. Джол, кёпюр ишлеу сууаблыкъ ишди. Гитчекъарачайчыла бек къууанадыла бу джолну ишленнгенине. Мен айтханны джаратханла, джаратмагъанла да болурла, КъЧР-ни Башчысы Темрезланы Рашид бизни республиканы къурулуш площадка этиб къойгъанды. Ол республиканы Башчысы болгъанлы 400-ден аслам социал объект ишлетгенди. Бизнича гитче республикагъа ол кёбдю. Сау болсун, республиканы джамагъатыны къайгъысын кёргени ючюн, – деди Хубийланы Гитче.
Джангы джол ачылгъанындан сора алайгъа джыйылыб тургъан халкъ, транспортларына миниб, «Медовые водопады» турист базада боллукъ Къарачай айранны фестивалына барыргъа ашыкъдыла.
Къарачай айранны фестивалына КъЧР-ни Башчысы Темрезланы Рашид, аны биргесине сыйлы къонакъла да баргъан эдиле. Темрез улу алайда да джамагъатны аллында сёлешди эмда 500-литрлик чоюнда джангы уюгъан айрандан да ичди…
КЪОБАНЛАНЫ Махмут.
