Мындан алда КъЧР-ни Башчысы Темрезланы Рашид уллу магъанасы олгъан темагъа аталгъан кенгеш бардыргъанды.

2019-чу джыл башил (январь) айны 15-де Эресей Федерацияны бютеу джеринде, 100 мингден артыкъ адамы болгъан шахарланы санамай, эфир аналог телевидение бериуле тыйыллыкъдыла. Бютеу кърал, аны ичинде Къарачай-Черкесия да болуб, 20 телевизион каналы болгъан, джер бла баргъан, хакъсыз цифралы телевизион бериулеге кёчерикди.

Регионну Башчысы Темрезланы Рашид билдиргенден, ол муратны толтурур ючюн, Минкомсвязь, РТРС, кърал властны органлары биригиб, кёб иш этгендиле. Къуру бизни республиканы джеринде, цифралы телевизион сигналланы иги берирге деб, 45 цифралы станция ишленнгенди. Цифралы бериуле республикада 99,8 процентге джетселе да, тау джерледе орналгъан узакъ элледе джашагъан миллет бериулени джангы форматы бла хайырланалмайды. Къарыусуз джашагъанла кеслери цифралы бериулеге керекли оборудованиени алалмай къыйналыргъа боллукъдула.

Аны ючюн, Башчы кенгешде кърал властны органларына, кеси кеслерине оноу этген джергили управлениеле, РТРС-ни къуллукъчуларына айтханына кёре, ала адамланы аллай къауумуна, башха болушлукъ кереклилеге да болушургъа борчлудула. Адамла керекли затланы алыб хазыр болур ючюн, ангылатыу ишле бардырыллыкъдыла. Аны ючюн кёбчюлюк информацияны мадарларын, социал сетлени да толу хайырландырыргъа тыйыншлыды.

«Правительство адамланы социал джаны бла джакъланмагъан къарыусуз джашагъан къауумуна болушурча, республикан бюджетден къаллай себеб боллугъуна сагъыш этерге керекди. Энтда да къайтарыб айтама, цифралы телевидениеге къарар ючюн не этерге кереклисин элледе джашагъан адамла толу билирге керекдиле», - дегенди Темрезланы Рашид.