Мындан алда Къарачай-Черкесияны ара шахарында дуниягъа белгили эресейчи актёр Василий Лановой чыгъармачылыкъ ингирини тамалында республикада Уллу Ата джурт къазауатны ветеранларын, регионал властны келечилерин алгъышлаб, аланы «Эресейни ёлюмсюз полку» деген Бютеуэресей джамагъат къозгъалыуну Сыйлы грамоталары бла саугъалады.

«Сау бол Къарачай-Черкесия, мен сизге бек разыма. Кертиси бла мында джамагъатдан джылыу урады, хар ишиме разы болуб къарайды. Энди мен «Къарачай-Черкесияны махтаулу артисти» болгъаным себебли, сизге кесими юйюме келгенча, дженгил-дженгил келе турлукъма», - деди Василий Лановой джыйылгъанланы алларында сёлеше.

Джаш тёлюню аскер-патриотлукъгъа юретиуге атаб бардыргъан ишлери ючюн, эмда джамагъат ишлени тири бардыргъанларын эсге ала Уллу Ата джурт къазауатны ветеранларын, Къанаматланы Хамит бла Карасов Якубну, «Эресейни ёлюмсюз полку» деген Бютеуэресей джамагъат къозгъалыуну Хурмет къагъытлары бла саугъаладыла.

Джаш тёлюге Ата джуртну сюерге юретиу, халкъны Уллу Ата джурт къазауатда этген джигитлигин унутмай эсде тутуу ишлеге къошхан энчи юлюшлери ючюн КъЧР-ни Башчысы эмда Правительствосуну Администрациясыны тамадасыны орунбасары Надежда Пивоварова, Къарачай-Черкесияны маданият министри Рамазан Бороков, КъЧР-ни аскер комиссары Арсен Темиров да белгилендиле.

«Биз джаныбызны-къаныбызны аямайын кесибизни Джуртубузну сакълагъанбыз. Сиз бизни республикагъа келгенигизге бек къууандым. Уллу фахмусу болгъан дуниягъа белгили актёр бла тюбешгениме ёхтемленеме. Сау болугъуз, бизге келгенигиз ючюн», - деб Къанаматланы Хамит Василий Лановойгъа разылыгъын билдирди.

Сыйлы къонакъгъа Надежда Пивоварова да, бюсюреу этди.

«Быллай уллу адамны къолундан саугъа алгъаным мени къууандырады. Василий Лановой бизни барыбызгъа да юлгюдю. Биз ол ойнагъан кинолагъа къараб ёсгенбиз. Мындан ары да алай болсун», - деди ол.

Андан сора Рамазан Бороков сёлешди. «Сизни Кърачай-Черкесияны, бютеу Эресейни джамагъаты сыйлайды, сюеди. Этген ишигизни къараучула бек джаратадыла, киноларыгъызда эресейчилени талай тёлюсю ёсгенди. Сизни джигитлигигизни дараджасы мийикди, сау болугъуз! Биз сизге таза джюрекден кючлю саулукъ, рахат джашау теджейбиз», - деб белгиледи Бороков.

Андан сора да Къарачай-Черкес Республиканы Правительствосуну Хурмет грамотасы бла, джаш тёлюню кёб джылланы аскер-париотлукъгъа юретиуге, Уллу Ата джурт къазауатда ёлгенлени эсгериуге къошхан юлюшю ючюн, Лановойну «Тёлюле сау болугъуз, кертилигигиз ючюн» деген аскер-патриот программасыны  концерт директору Антонина Журавлёва саугъаланды. 

 

Лепшокъланы Хусеин.

 
{jcomments}