Озгъан ыйыкъда бютеу къралдача, Къарачай-Черкесияда да Эресейни ич ишлерини органларыны къуллукъчуларын санагъат байрамлары эмда Эресейчи полиция къуралгъанлы 300 джыл толгъан юбилейи да кенг белгиленди.
Къууанч джыйылыугъа Къарачай-Черкесияны ич ишлерини министри Трифонов Игорь, КъЧР-ни Правительствосуну Председатели Озов Аслан, республиканы Правительствосуну эмда Администрациясыны башчысы Озов Мурат, Халкъ Джыйылыууну (Парламентини) депутатлары, ФСБ-ны КъЧР-де управлениесини тамадасы Кобыляченко Игорь, Къарачай-Черкес Республиканы Баш сюдюню председатели Семенланы Руслан, Росгвардияны КъЧР-де бёлюмюню тамадасы Сылпагъарланы Рашид, джамагъат бирлешликлени, республиканы шахарлары бла районларыны келечилери, кюч эмда надзор ведомстволары, МВД-ны энчи къурамы, ич ишлерини органларыны ветеранлары, эмда башхала келген эдиле.
Байрам джыйылыуну аллы борчларын толтура ёлген джигит полициячыланы эсгериу бла башланды. Аланы хар бирини суратын экранда кёргюздюле. Ызы бла бир такъыйкъаны шум болуб аланы эсгерген да этдиле.
Къарачай-Черкесияны Башчысы Темрезланы Рашид миллетни аллына чыгъыб Ич ишлени органларында ишлегенлени эмда ветеранланы санагъат байрамларыны кюню бла, бу къуллукъ къуралгъанлы 300 джыл толгъан юбилейи бла да джылы алгъышлады.
- Къарачай-Черкес Республиканы Ич ишлерини министерствосунда, джюзле бла полициячы офицерле бла тюз къуллукъчула, джанларына къоркъуу болгъанына да къарамай, джамагъат джорукъну, адамланы, аланы мюлклерин сакълауда уллу джигитлик, тёзюмлюлюк кёргюзюб къуллукъ этедиле. Борчларын толтура ёлгенлени мемориалында да джазылыбдыла аланы атлары. Аны себеби «джамагъатны сакълагъан солдатха» Ата джуртну, халкъны алларында борчларын толтургъандан сыйлы борч джокъду, аллай адамны аты уа халкъны эсинде ёмюрлюкге сакъланныкъды. Биз, закон ючюн, граждан рахатлыкъ, къралны бирлиги ючюн джан бергенлени сый бериб, эсге тюшюре, аланы алларында бёрклерибизни алабыз. Аланы юйдегилери бла эт адамларына къайгъырыб турууну уа биз кесибизни сыйлы борчубузгъа санайбыз, - деди Темрез улу.
КъЧР-ни Башчысы республиканы Ич ишлени министерствосуну башчылыгъы бла республикада оператив къуллукъну этимлилигин ёсдюрюу, халкъны джамагъат джорукъну сакълаучу органлагъа ышанмакълыгъын бегитиу джаны бла уллу иш бардыргъанын да айтды. Ол чертгенден, ич ишлени органларыны джумуш баджарыулары игиленнгендиле, оператив къуллукъну кёргюзюмлери кёлтюрюлгендиле.
КъЧР-ни Башчысы къуллукъларын толтурууда атларын айтдыргъан алчы полициячыланы саугъалады. Ол РФ-ны Президенти Владимир Путинни указы бла полицияны полковниги Боташланы Ансаргъа «Джамагъат джорукъну айырма сакълагъаны ючюн» деген медалны берди. Полицияны майору Прокопенко Викториягъа да «Къарачай-Черкес Республиканы ич ишлерини органларыны махтаулу къуллукъчусу» деген сыйлы атны берди. Темрезланы Рашид полицияны ветеранларына да саулукъ-эсенлик, адамланы законлу излемлерин сакълау джаны бла бардыргъан ишлеринде алагъа джетишимле теджеди.
КъЧР-ни Правительствосуну Председатели Озов Аслан да байрам бла алгъышлаб, къуллукъларында толу борчларын толтургъан, айырылыб танылгъан полициячылагъа Правительствону Махтау грамоталарын берди.
Министр Трифонов Игорь да Къарачай-Черкесияны ич ишлерини органларыны къуллукъчуларын санагъат байрамлары бла алгъышлаб, ала баджаргъан уллу ишле бла борчланы юслеринден да сёлешди. Ол джамагъатны ышанмакълыгъын толтурур ючюн, полициячыла къарыуларын аямай кюрешириклерин чертиб, бусагъатха дери ол ишде тирилик танытхан талай адамгъа ведомствону саугъаларын берди.
Джыйылыуну аягъында республиканы белгили артистлери концерт кёргюздюле.
БАТЧАЛАНЫ Фатима.
