Бу кюнледе Москвада каратэни «До Шотокан Рю Казэ Ха» тюрлюсюнден дунияны III-чю кубогуну XXIII-чю халкъла арасы эришиулери ётгендиле.

Анга къошулгъанланы араларында бизни джердешибиз, WKF каратэни «ката» эмда «кумитэ» тюрлюлеринде Шимал Кавказ, Бютеуэресей эришиулени чемпиону, каратэни «До Шотокан Рю Казэ Ха» тюрлюсюнден Европаны талай кере чемпиону 13-джыллыкъ Борлакъланы Алана да болгъанды. Эришиулеге бютеулей да 28 къралны келечиси къошулгъанды.
Борлакъланы Алана ол эришиуледе республикабызны атын махтау бла айтдыргъанды – ол каратэни «До Шотокан Рю Казэ Ха» тюрлюсюнден дунияны кубогун алгъанды.
Алана кеси айтхандан, хорламлы болгъан анга тынч тюл эди, спортда сени бла эришген адамны да сыйын кёрюрге тыйыншлыды.
«Эришиуле къыйын ётселе да, къарыууму-кючюмю салыб кюрешгенме. Мени бла эришгенлени хар бирин шохларымча кёреме. Эришиулени аллы бла «мен хорламлы болсам, атам-анам, юретиучюлерим, устазларым къаллай бир къууанныкъдыла» деб сагъыш эте эдим. Мурат этгенимча хорламлы да болдум», - дейди Борлакъланы Алана.
Чертиб айтханда, Алана каратэни «До Шотокан Рю Казэ Ха» тюрлюсюнден Евразияны кубогуну эки кере чемпионуду, WKF каратэни 2-чи баш разряды, каратэни къалгъан тюрлюлерини 3-чю баш разряды берилгенди.

БИЧЕНЧИЛАНЫ Умар.