Алчакъланы Хаджи-Исмаилны къызы Къызбала джумушакъ сёзлю, татлы тилли эди. Аны адамлыгъы, бет нюрю, башхалагъа къайгъырыуу кесине илешдиргенлей тургъанды.
Аны ючюн болур эди, адамла аны сыйын мийик кёре, айтханын джерге тюшюрмей эдиле. Къыйын болумда, кёчгюнчюлюкню джылларында, сабий заманында уллула бла тенг ишлеб, гитче эгечи Фатима бла къарнашы Османны окъутханды. Алай бла кеси 4-чю классдан сора окъур мадар табмагъанды. Алай болса да, китаб, журнал, газет окъугъанлай тургъанды.
Къызбала 1930-чу джыл Тёбен Тебердиде Алчакъланы Хаджи-Исмаилны урунууну сюйген джигер юйдегисинде туугъанды. Атасы Хаджи-Исмаил назмугъа, джыргъа уста болгъанды.
Къызбалагъа эки джыл болуб, атасы Хаджи-Исмаил юйдегиси бла Сынтыдан, Сары-Тюз элге кёчюб келиб, джангы, келбетли джуртда юй салыб орналады. Заман бара, гитче къызчыкъгъа тогъуз джыл болуб, элни школуну ал классына джюрюб башлайды. Джомакълы Къобанны бойнунда сабийчик юч классны бошаб, ойнай, джырлай тургъанлай, 1943-чю джыл зарауатлыкъны ачы джели джетиб, Къарачай халкъны Орта Азия бла Къазахстаннга элтиб тёгедиле. Алчакъланы Хаджи-Исмаил юй бийчеси Чораланы Айшат бла сабийлери Къызбала, Фатима да биргелерине, Къазахстанны Джамбул областыны «Биликуль» совхозуна тюшедиле. Башха къарачай юйдегилеча, бу юйюр да былайда 14 джылны ичинде зорлукъну, артыкълыкъны азабын сынайды. Къазахстанны къум тюзлеринде Къызбала, башха талай къарачай сабийча, къарыуу джетгенине кёре совхозну уллу сабанларында гардошха, нартюхге, башха ёсюмлюклеге чага этиб, иги къарагъанды. Ёсюб, абадан болгъанында, таулу къызны совхозну 3-чю фермасына ишге кёчюредиле. Былайда да джигерликни юлгюсюн кёргюзеди.
Танг белги бергенлей, тенг къызлары бла, ёгюз арбалагъа миниб, бичен ызгъа барыб, дюрюлени джыйыб, сенек ауузланы арбалагъа джюклеб, ташыб скирдге ургъандыла. Къыш а биченни арбала бла фермалагъа ташыгъандыла. Ол кюн сайын танг атхандан къарангы ашхамгъа дери юлгюлю ишлегенди. Кюнлюк планын 130-140 процентге толтургъанды. Инджилсе да, тёзюб, чыдаб, джуртуна къайтыр мурат бла джашагъанды. Мийик джетишимин эсге ала, кърал аны «Уллу Ата джурт къазауатны заманында джигер уруннганы ючюн» деген медаль бла саугъалагъанды. Джигер таулу къыз медалла андан сора да алгъанды.
Ауушханды, джандетли болсун.
Узеирланы Хусей.
