Багъалы джердешле! Къарачай халкъны джангырыууну кюню бла барыгъызны да таза джюрекден алгъышлайбыз! Бизни республиканы тарихине хычаман (май) айны 3-сю къыйын, ауур, аны бла бирге къууанч кюнча тюшюбдю.

Ол кюн 67 джылны мындан алда Къазахстан бла Орта Азияны тюзлерине чачылыб, 14 узун джылны сюргюнде тургъан къарачайлылагъа Кавказгъа джол ачылды деген хапар, кесин кёб сакълатса да, ахыры келген эди.
Киши джуртда туугъан сабийле, ёз джуртларыны юсюнден уллула айтхан хапарла бла ёсген джаш адамла, урунууда, уруш тюзледе атларын айтдыргъан эркишиле бла тиширыула, туугъан тауларыбызны кёрюб бир ёлюр эди деб термилген къартла – бары да Джуртлары таба джол тутхандыла. Мында аланы алларына къарагъан джердешле – кёб тюрлю миллетни келечилери – джылы тюбегендиле. Оюлгъан, чачылгъан стауатларын джангыдан сюерге, джангы джашау къураргъа барындан да бек туугъан республикаларыны, къралларыны, халкъ мюлкню бютеу санагъатларыны ёсюмлерине энчи юлюш къошаргъа керек эди.
Бюгюнлюкде кёб тюрлю миллет бир юйдегича джашагъан Къарачай-Черкесияны башха тюрлю кёзюнге кёргюзеллик тюлсе. Къыйын кюнде бирге къыйнала, джетишимлерибизге да алай къууана, бирге байрамлай, бирден силкиниб алгъа бара, бюгюнлюкде биз уллу къралыбызны бирикген, ёсюмню джолунда таукел атлагъан регионубуз. Къачан да былай болуб турсун!
Юйюгюзге ашхылыкъ джаусун, джашауугъуз мелхум болсун! Ата джуртубуз джашнасын!

Къарачай-Черкес
Республиканы Башчысы
Темрезланы Рашид

Къарачай-Черкес Республиканы Халкъ Джыйылыууну (Парламентини) Председатели Иванов Александр

  Къарачай-Черкес Республиканы
Правительствосуну Председатели
АРГУНОВ Мурат.